E prome grupo di ‘bursalen’ di Corsou a sali pa Hulanda diadomingo

WILLEMSTAD - Ayera djadumingu e promé grupo di hóben ku a kaba nan estudio na Kòrsou a sigui pa Ulanda pa nan edukashon mas avansá. E grupo aki djabièrnè pasá a bai kita nan nòmber for di kranshi i tur esaki bou di e guia di Virtual Youth Support.

Na airopuerto EXTRA a papia ku Annelies Lourentsz Barbolina enkargá ku e ofisina di Virtual Youth Support aki na Kòrsou. El a menshoná ku ayera ta 50 hóben a bai Ulanda pero total nan tin 90 hóben ku a sigui nan guia ku ta bai studia na Ulanda.

Segun sra Lourentsz Barbolina ayera a bai 50 studiante. Banda di e grupo di ayera, tin algun ku a bai kaba i algun ta keda un tiki mas Kòrsou i despues ta bai Ulanda riba nan mes.

E aña aki tin 90 studiante ku nan ta guia, repartí den e diferente munisipio na Ulanda. Nan lo bai hasi diferente tipo di estudio i diferente direkshon na diferente nivel manera HBO, WO i MBO.

E aña aki Virtual Youth Support tabatin oportunidat di guia e hóbennan for di momentu ku nan kier a skohe un estudio pero no tabata sa kua estudio nan skohe. A yuda ku nan Duo, prepará nan riba diferente tereno manera ku ulandes, wiskunde, kon traha presupuesto, kaminda di biba, pa asina ora nan yega Ulanda nan por inskribí pa un BSN pa e otro prosesonan ku nan mester na Ulanda por kana mas fásil. I e portanan di Kòrsou ta keda habri pa risibí e studiantenan bèk ora nan kaba di studia, ta loke sra Lourentsz Barbolina a terminá bisando. NOTA: E texto ta scirbi den Papiamento fonetico di Corsou.