Cruz Cora di Aruba ta activo pa carnaval 70, despues di acuerdo cu SMAC

ORANJESTAD – Contrario na e aña aki ora cu e fundacion responsabel pa Carnaval, SMAC, a usa otro grupo medico pa asisti nan durante eventonan carnavalesco, pa proximo aña, esta 2024, Cruz Cora di Aruba ta bek como e grupo oficial pa bringa asistencia medico atrobe. SMAC a informa diamars cu nan a reuni cu Vereniging Red Cross Aruba recientemente y a yega na palabracionnan pa Aruba su Carnaval 70. 

ACUERDO

Despues di a reuni cu Presidente di Vereniging Red Cross Aruba Sr. Luis Oduber y Sra. Indra Pereira a yega na un acuerdo definitivo cu SMAC lo haci uzo di Red Cross su servicio pa parada y eventonan  di Carnaval den 2024. Segun SMAC< countdown di Aruba su Carnaval 70 ta sigui y awe cu ta 11 di juli, nos ta 4 luna leu di 11-11 cu ta e pre-ambulo di Carnaval 2024. “Keda pendiente cu nos lo sigui informa e pueblo Carnavalesco tur luna, loke nos tin den tapara” SMAC su presidente Darren van Ommeren a finalisa bisando.

E AÑA AKI

E aña aki tabatin poco comocion ora cu SMAC no a usa Cruz Cora di Aruba y a opta pa un otro grupo medico. Cruz Cora e momento ey a bisa cu no a yega na acuerdo cu SMAC, y cu no a reuni cu otro. A compronde cu placa tabata un problema y cu pesey a opta pa laga Cruz Cora afo e aña aki. Algo cu awor ta pa pasado. SMAC sinembargo no a bisa kico e acuerdo aki cu Cruz Cora ta encera, particularmente pa e gastonan cu ta envolvi. Importante ta cu Cruz Cora ta bek y lo forma parti di carnaval 70, den forma di cuido medico durante e eventonan carnavalesco si ta necesario.