ABC den corte: Trahamento di beach artificial dilanti Embassy Suites ta causa daño serio na naturalesa

ORANJESTAD – Abogadonan di e fundacion Aruba Birdlife Conservation (ABC) y propietario di e hotel Embassy Suites, esta Natura Development NV a topa otro den corte, unda cu partidonan kier haya interpretacion di un huez riba kico por y no por den e disputa entre e partidonan en cuestion pa cu e beach dilanti e hotel. Tabata na casi fin di juni ultimo cu despues di un bishita di minister Ursell Arends, ABC y otro instancianan na e sitio en cuestion cu a dicidi pa pidi huez un medida di orden temporal, pa para tur trabou di engrandece y traha un beach dilanti e hotel. Esaki pasobra segun ABC, e proceso tabata causa destruccion na naturalesa, specificamente e asina yama Yerba di Caña, cu ta un especie di laman protegi. Natura Development di nan banda a argumenta cu e puntonan di ABC no ta valido, usando splicacion y puntonan legal pa prueba nan punto. Ademas a pidi huez pa declara e peticion di ABC no admissible, y tambe a yama e alegacionan contra e compania como absurdo. 

DEFENSA

E defensa di ABC a enfoca su prome parti riba e parti di naturalesa, splicando cu den e afan di e compania en cuestion pa traha un beach artificial, nan ta eliminando e tipo di yerba conoci como Yerba di Caña, cu ta entre otro fuente di cuminda pa Tortuga cu ta frecuenta e area. Ademas a compara e especie cu e mata Fofoti, cu tambe ta uno proteha, pero cu pasobra e ta mas visible cu e yerba, ta haya mas atencion. Pero segun e abogado en cuestion Geert Rep, e yerba tin mesun importancia cu e Fofoti. A alega cu ora cu e compania a traha e tunnel pa huespednan di e hotel tin acceso miho na e beach, no a tende cuenta caba suficiente cu naturalesa, y awor tampoco. Dado momento a mustra un video chikito unda cu por a mira un bacu ta saca e yerba for di e laman y tira nan otro caminda. Segun ABC su defensa, a adverti Natura Development di esey, pero nan no a tene cuenta cu esey. Ta mustra segun ABC, cu e daño na naturalesa ta enorme. Entregando varios rapport, a purba mustra kico e efecto di e yerba tin y kico e daño ta pa cu e naturalesa eynan. 

REUNION CU MINISTER

ABC a bisa tambe cu a compronde cu un dia prome cu e caso di awe, tabatin un reunion entre e compania Natura Development y minister Ursell Arends. Y segun informacion cu ABC a ricibi, for di documentonan di Natura, cu durante e reunion ey, a bisa e minister cu nan ta di pensamento cu no meste di un ‘ontheffing’ osea exoneracion pa por traha eynan, y si un peticion pa un exoneracion, lo tabatin posibilidad di sali positive pa nan y tambe con largo esey lo a dura. E minister lo a contesta cu e no por a duna un comentario of contesta ariba, te ora cu e peticion a keda entrega, y cu Natura lo mester a haci uso di e parti banda pariba di e ‘kibraola’ unda cu ya tin un beach. ‘Cu otro palabra, si corte dicidi cu ABC su peticion wordo rechasa, e daño pa naturalesa lo ta directo, pasobra natura lo no tin un sancion riba su cabez’. 

NATURA NO A CUMPLI SEGUN ABC

Segun ABC, Natura Development no a cumpli cu e reglanan di e loke a otorga nan, locual Natura ta sigura cu no ta berdad. ABC ta referi na e condicionan di erfpacht otorga na Natura na September di 2015, unda cu ta mustra ningun caminda cu Natura tabatin un permiso pa un tunnel of un beach. Tambe a mustra un documentacion di October 2018 unda cu ta mustra cu a haci e peticion pa un beach y un tunnel, cual minister di e tempo ey, Otmar Oduber a manda esaki hopi lihe pa DNM (Directie Natuur en Millieu) den apenas un siman, pero cu DNM a conseha contra, pasobra e tabata den e zona di e ROP cu a wordo destina como espacio protegi. No obstante conseho aki, un aña despues, director di DIP ta bisa di no tin obhecion pa e beach. Aki tambe ABC ta argumenta cu e permiso pa construccion duna, a wordo duna empugna cu e ROPV. Ademas cu e beach cu mester a pone eynan, tabata den e asina yama zona marino. 

MULTA

A sigui e parti di multa unda cu ABC a compronde cu no por confia den palabra di Natura Development y a pidi huez pa aumenta e multa impone dia 23 di juni ultimo di mei miyon florin pa cada dia cu Natura Development viola e medida, cu mei miyon. ABC a haya cu tin un discrepancia den e interpretacion di e multa y como tal a pidi e cambio.  Y laat den atardi diabierna, huez a aproba esaki y aumenta e multa na 1 miyon florin. Huez ta dicta sentencia dia 2 di augustus proximo.