Mgr. Secco a pidi pordon pa lidernan religioso ku a deshumanisá bida di hende durante sclavitud

WILLEMSTAD – Den un deklarashon Obispu di Willemstad Mgr. Luis A Secco relashoná ku 160 aña abolishon di sklabitut, Obispu ta pidi pordon pa aktonan kondenabel i kontra prinsipionan di e fe kristian ku sierto lidernan religioso i miembronan individual di Iglesia Katóliko, den e tempu ei, basá riba pensamentu eróneo di Santa Skritura i pa benefisio personal partikularmente ekonómiko,  a deshumanisá bida di hende.

Den nan nota pa prensa, Obispu di Willemstad ta duna di konosé ku, konmemorá 160 aña abolishon di sklabitut den Reino Hulandes ta pidi pa komo katóliko para ketu na e periodo doloroso di historia den kua humanidat a sufri sklabitut.

E konmemorashon aki ta kuadra ku e proseso sinodal inisiá na aña 2021 pa Papa Francisco. Esaki ta enserá ku komo pueblo di Dios ku ta kana huntu, ta skucha, ta komuniká i ta respetá tur ku ta forma parti di komunidat.

La Komo obispado di Willemstad, yamá pa pastoreá i goberná e seis islanan ku ta forma nos Diósesis i ku a biba i eksperensiá konsekuensianan tristu i humiante di sklabitut, ta rekonosé ku:

Sierto lidernan religioso i miembronan individual di Iglesia Katóliko, den e tempu ei, basá riba pensamentu eróneo di Santa Skritura i pa benefisio personal, partikularmente ekonómiko, a deshumanisá bida di hende.

E aktonan aki ta kondenabel i kontra prinsipionan di e fe kristian. ‘Pa esaki mi ta pidi pordon!’, ta loke ku Obispu di Willemstad Luis A. Secco a ekspresá.

‘Nos ta konsiente ku aktualmente ainda tin hende ta biba sklavisá: mundu no ta liber di sklabitut. Nos pasado di sklabitut ta doloroso pero e ta persiguí nos te ainda. Komo katóliko nos ta yamá pa wak e parti akí di nos pasado ku konsenshi krítiko. No laga nos pensa ku esakinan ta invalidá e sirbishi di Iglesia, ku pa medio di kongregashonnan religioso misionero a prediká i praktiká ku entrega generoso e obranan di miserikòrdia spiritual i korporal den nos islanan lantando skolnan, hospitalnan, lugá di deporte, ansianato i hasta lugá di kuido pa leproso. Den tur momentu a laga e Palabra di Dios i e Sakramentunan yega na tur hende, na un manera spesial na esnan mas pober i bandoná’ Obispu ta enfatisá.

Ku bista riba futuro konvikshon katóliko ta eksigí pa tur hende komprometé pa kana ku otro e proseso di liberashon, rekonsiliashon i sanashon sosial i spiritual.

Nos ta rekonosé ku nos tur ta ruman i ku un dia bon Dios lo puntra: “Unda bo ruman ta?” (Gen 4,9). E nota ta terminá. NOTA: Texto ta scirbi den Papiamento fonetico di Corsou.