Hulanda ta insisti! Aruba no por corta menos cu 60 miyon den cuido pa 2023 y despues

DEN HAAG –  Gobierno Hulandes ta insisti di no kier tende di recorte den cuido di menos cu 60 miyon florin pa 2023. Asina e ministerio di relacionan interior (BZK) ta sigura noticiacla den un clarificacion diabierna (awe). Den un articulo anterior caba den Noticiacla, e Ministerio di Relacionan Interior (BZK) cu ta resorta bou di secretario di estado Hulandes Alexandra van Huffelen, a bisa cu e recorte di 51 miyon florin  presupuesta pa 2023 ta mas cu e sumanan di añanan anterior, pero no suficiente.

BZK TABATA MAS CLA AWE CU PROME 

Awe, BZK a clarifica e asunto mas ainda pa Noticiacla. “Pa Hulanda ta conta cu Aruba mes por dicidi con ta aplica e recorte (den cuido), basta e ta suficiente y robusto y ta wordo aplica na tempo”. Gobierno di Aruba (lesa: minister Dangui Oduber), nunca no a nenga esaki y a admiti cu nan sa cu ta keda na nan con pa aplica e recorte aki. Problema ta, cu e suma cu nan ta cortando, no ta e suma acorda cu Hulanda. Ademas,  si tabatin cualkier duda di e ultimo articulo publica den e portal aki, awe BZK tabata mas cla. “Importante ta cu e recorte di 60 miyon completo (y no menos:red) (mester) wordo realisa den 2023 y despues”. Cu esaki e ta clarifica cu Aruba mester sigui implementa e recorte (completo) pa e proximo aña(nan) tambe. Y si tin cualkier duda kico lo pasa si Aruba no cumpli, noticiacla a haya e siguient mensahe:” “Hulanda ta sali di e punto di bista, cu Aruba ta respeta RMR (Conseho di Minister di Reino) y e decision tuma, y ta realisa e recorte den cuido pa full (e suma di ) 60 miyon   den 2023 y mas leu”.   

A INFORMA CAFT PERO NO GOBIERNO HULANDES

BZK a clarifica tambe cu contrario na informacion cu ta circulando,  gobierno di Aruba no a informa BZK (Lesa: Gobierno Hulandes) di e   paro unilateral di e recorte di 5.5% den cuido, sino a informa CAFt solamente. Por corda con gobierno a bisa cu a informa Hulanda, y tabata ora cu BZK a check cu CAFt, a bin tende via media tambe di e decision di e paro di recorte di e 5.5% den cuido. Aki CAFt a splica Noticiacla recientemente cu e ta wardando ainda pa wak e presupuesto ‘adapta’ y despues lo dicidi kico ta pasa si Aruba ta logra cumpli cu e promesanan haci. Aruba a priminti CAFt di bin cu un plan multiannual cu lo tin cu compensa e suma cu Hulanda a pidi pa corta. Cuanto esaki ta, no ta conoci ainda, pero gobierno di Aruba a sigura cu e lo ta conforme palabracion di e landspakket. 

CAFT SU REACCION RECIEN

Mientrastanto, recientemente den un carta di CAFt na gobierno, nan si ta confirma cu nan a haya notificacion di gobierno di Aruba di e cambio unilateral di kita e recorte di 5.5% recientemente y kier pa gobierno presenta esaki na CAF, ‘prome’ cu e entrega e modificacion di e presupuesto 2023, na Parlamento. Anteriormente esaki no tabata necesario, pero e biaha aki CAFt ta pdi specificamente pa esaki. Seguidament den un tono mas ‘alentador’ CAFt ta bisa cu mientras cu nan ta positivo cu AZV ta tumando pasonan concreto pa yega na un raportahe multiannual di e gastonan y entrada den cuido, e kier pa implementa e raportahe aki den e presupuesto di 2024.