Zulema Erasmus poni pa bira Minister Plenipotenciario na Washington

ORANJESTAD - Minister Ursell Arends diabierna a informa cu sra. Zulema Erasmus, a ser postula como e siguiente Minister Plenipotenciario na Washington. Esaki despues cu e candidato anterior, abogado mr Ronny Wix, sorpresivamente a ‘bula afo’ na ultimo ora recientemente. E motibo no ta conoci pakico e la ‘bula afo’ Esey a nifica cu partido RAIZ su minister mester a busca un otro candidato y esaki a bira Zulema Erasmus. Awor ta cuminsa e proceso di screening pa finalmente sra Erasmus por cuminsa su labor na Washington. No ta conoci ki tempo esaki lo bira, pasobra e proceso di screening por tuma basta tempo. 

KEN TA ZULEMA

Zulema ta traha pa Gobierno di Aruba desde 2005. Actualmente e ta eherce e funcion di Afdelingshoofd na Departamento di Asuntonan Economico, Comercio y Industria di cual e tin un team encarga cu Business Support, Export Promotion, Investment Promotion y Trade Policy. E tin e funcion tambe di Directora Interino di e Departamento. 

EDUCACION

Zulema a gradua na Rijksuniversiteit Groningen den International Relations/International Organizations despues di a caba VWO na Colegio Arubano. Un stage na Ministerio di Asuntonan Exterior cerca e Adviseur Koninkrijkszaken a duna Zulema e conviccion cu e miho manera pa aporta na bienestar y progreso di su dushi isla, ta pa traha na Aruba mes. ? 

OPINION

Semper e tabata di opinion cu aunke Relacionnan Exterior ta un tema di Reino, cu Aruba por ta un pionero riba nivel internacional y por influencia e agenda internacional. Zulema ta mira cu Aruba tin hopi candidatonan cu por funciona exitosamente den diplomacia den Reino Hulandes, pero e oportunidadnan ta limita pasobra mester competi cu Hulandesnan pa un funcion diplomatico na Ministerio di Asuntonan Exterior. ? 

Den su carera como ambtenaar, Zulema a eherce e funcion di beleidsmedewerker na Departamento di Asuntonan Economico, Comercio y Industria, como na Departamento di Asuntonan Exterior. Su experticio den gobierno a amplia ora Zulema a traha na Bestuurskantoor prome como Adviseur di Minister y despues como Waarnemend Secretaris di Conseho di Minister, na unda e a experencia di cerca e proceso di decision politico.

Banda di su trabou, Zulema a contribui na empoderacion di hobennan door di ta docente part-time di Organization, Governance and Management na Universidad di Aruba. Desde 2021 Zulema ta Segunda Secretaria-General den e directiva di Comite Olimpico Arubano. Recientemente e a forma parti di e Comision Bishita Real instala door di Minister-President riba solicitud di Gobernador di Aruba.?Zulema ta casa desde 2004 cu Melvin Dabian y ta mama di un yiu muhe (20) studiando na Hulanda y un yiu  homber (16) cu tin ambicion pa bira un Student-Athlete den Atletismo. ?