Un di Aruba su ciudadanonan mas bieu y keri, Frans Croes a cumpli 105 aña awe!!!

ORANJESTAD – Awe un di Aruba su ciudadanonan di mas bieu y mas keri a cumpli aña atrobe. E conocido comerciante Frans Croes, a cumpli e bunita edad respeta di 105 aña. Y loke ta hacie mas special ainda ta cu e ta bon bij, y ta hunga carta y ajedrez casi tur dia. Loke ta curioso tambe ta cu awe ta luna 5, y dia 10, y hunto bo por combin'e y e ta bira e cifra di 105. Noticiacla tin varios aña ta sigui e ciudadano keri aki, y tur aña ta actualisa e raportahe un poco. E siman aki ainda di casualidad, su yiu mas conoci, Maybeline Arends- Croes tabata comenta cu Noticiacla, cu su papa ta keto bay hunga su ajedrez tur dia! Y cu si Dios duna bida y salud, e ta yega su di 105 aña e siman aki. Y awe ta asina leu cu Frans a alcansa e edad aki tambe, y den bon salud y ambiente. Manera ya ta conoci awor, Frans Croes ta tata di entre otro e conocida docente di musica Maybelline Arends Croes y Sandra Croes, hopi conoci den mundo di deporte. Hopi conoce Frans porta como e propietario di e conocido agencia di productonan di beyesa Fa Croes NV. 

KEN TA FRANS CROES

Frans Croes ta yiu di Jan Laurens y Dorilia Croes, e mayo di 4 yiu y e unico yiu homber. E mes a haya 6 yiu di cual Maybelline ta esun mayo. Frans a cuminsa traha na gobierno y despues a bay traha na Lago. Pero despues toch el a bolbe bay traha pa Gobierno unda cu el a traha te ora cu el a cumpli 50 y a baha cu pensioen adelanta. Aki ta unda cu el a dicidi di habri e agencia Fa Croes NV, y a basa su mes riba producto y meubulario di beyesa, ya cu su casa, conocido Aura Croes (dfm) tabata peluquera pa mas di 40 aña. Y no cualkier peluquera sino hasta tabata hof peluquera (a haci cabey di prinses Beatrix entre otro). Señora Aura a fayece lamentablemente 4 aña pasa. Si e tabata na bida, e pareha feliz lo a cumpli 75 aña di feliz bida matrimonial. 

TRANKILO

Frans Croes ta un persona alegre, trankilo, neutral, y cu a inculca principio di respet y disciplina den tur su 6 yiunan. “Nunca mi no a tende mi mayornan papia palabra malo”, e yiu mayo Maybelline ta conta Noticiacla. Di un persona di e edad avansa asina cu ainda tabata core su auto cu 100 aña di edad, no mester ta sorpresa e ora cu ta na e edad di 70 aña, el a cuminsa siña toca guitara. Frans Croes, un homber trankil, recto y cu un forma di biba, cu a lague yega e edad hopi respeta y bunita di 105 aña. Noticiacla ta desea Frans y famia completo, hopi aña mas di bida, den compania di su sernan keri!.