Mike Eman: AVP kier aumento substancial di pensioen pa nos grandinan

ORANJESTAD - “Ta imposibel pa pensionado cu ta biba di un entrada di pensioen so por tin un bida digno cu e costo di bida actual. Sea e pensioen di SVB mester worde aumenta conciderablemente of gobierno tin cu aumenta e reparatietoeslag cu AVP a introduci pa cada pensionado conciderablemente”. Ta palabranan di e lider di partido AVP Mike Eman riba e tema di pensioen. 

CIFRA TA PAPIA PA SU MES  

Segun Eman, e cifranan ta papia pa nan mes. E dolor cu nos ta scucha di nos pensionadonan ta worde confirma pa e cifranan di CBS y SVB. Tanto e pensionado soltero como pareha ta core cu un deficit grandi tur luna. Den su relato final pa anja 2022 CBS a duna di conoce cu un persona adulto mester di 2560 florin minimal pa luna pa un sobribencia digno. E pensioen di un soltero segun cifranan di SVB ta 1215 florin pa luna. Esaki kiermen cu un pensionado soltero cu ta biba su so ta core cu un deficit di 1345 florin pa luna, Eman ta sigui bisa. 

NO TA PROME BIAHA

Segun Eman, cu no ta promer vez cu AVP ta bisa y haci e cambionan aki pa nos pensionadonan. Eman ta bisa cu no por otro, mester bin un aumento substancial di pensioen pa nos grandinan, sino nos pensionadonan lo keda biba bao di e linea di sobrebibencia cu e propio CBS ta calcula tur luna.