Aruba experenciando un brote atrobe di virus di Parvo pa cacho puppy

ORANJESTAD – Aruba un biaha mas ta afecta pa un brote di e malesa di cacho ‘Parvo’, cu ta afecta primordialmente cachonan ‘puppy’. E siman aki ta Aruba Animal Shelter a haci e anuncio fastioso aki. Tabata na 2018 cu Noticiacla a raporta un brote di e malesa aki unda cu e tempo ey, veterinario conoci Natalie Booi a splica e seriedad di e situacion. “Nos ta logra di scapa casi tur pero normal mortality rate ta 85%” Booi a bisa e tempo ey. A splica tambe cu no obstante tratamento, un cantidad di 35% no ta sobrevivi. E unico forma pa vence e malesa mortal aki, ta pa vacuna bo cacho, sigur esnan bou di un aña di edad y mas aun bou di cachonan di 4 luna cu no tin vacuna. 

CON PA HACI

Segun Booi e tempo ey caba a splca cu berdad e unico forma pa preveni esaki ta pa vacuna bo puppy, (cacho chikito) y evita di bay cu ne yen di lugar. Ta un mal custumber (pero comprendibel) cu hende cu tin un puppy, kier bay tur caminda cu ne, laman, riba caya, aunke cu e no ta vacuna y of tin tur su vacuna. Nan ta haci’e pasobra sea e puppy ta ‘cute’ y kier ‘show off’ cu ne, of simplemente kier goza cu ne. Problema ta cu tanten cu e puppy no tin tur vacuna, e ta keda un risico grandi pa haya e malesa. Unabez cu e puppy tin tur su vacunanan, e tin resistencia contra practicamente tur malesa y ta ‘safe’ pa ta riba caya. Segun Booi, tin cierto rasa cu tin mas risico pa haya e malesa, manera cachonan color scur y tan.

CANTIDAD

E cantidad segun Booi a splica biaha pasa caba ta hopi cu ta bin pa dia. E tempo ey nan tabata haya entre 6 pa 10 caso pa dia. “Nos ta logra salba mayoria pero e ‘mortality rate’ (cantidad cu ta muri) , ta keda halto na 85%” e la bisa . Veterinario conoci Barendsen tambe ta confirma esaki.   Experiencia ta cu durante periodo di vacacion, a trata hopi cachonan hopi malo cu Parvo, tur ta cachonan puppy no vacuna of sin tur nan vacuna, cu ta bin desespera en busca di ayuda. Booi como a  a mustra biaha pasa caba tambe cu riba e respectivo pagina  di Facebook di Animal Care Clinic, tin tipsnan valioso cu por yuda un doño di puppy combati y nota e simptoma di un cacho cu por tin parvo. Cachonan puppy despues di 6 siman di bida, por cuminsa wordo vacuna, y ta sigui nan schedule di vacuna te ora nan completa nan serie di por lo menos 3 pa 4 (si ta cacho di exterior) vacuna.

CON TA CONTAMINA

E malesa ta mas peligroso pa cachonan bou di 4 luna cu no tin vacuna ainda. E virus ta plama door di contacto directo entre cacho pa cacho, sushi contamina di cacho, ambiente di e cacho, e kennel, baki di cuminda y awa sushi, of hende cu tabata den contacto cu un cacho positivo pa parvo. Señalnan pa tene cuenta ta falta di apetit, keintura, sacamento, y diareah severo (cu sanger), dehidracion. Si bo mira simptoma asina, tuma contacto mesora cu bo veterinario.