Tata Arubiano porfin a admiti di a mata su yiu homber na Merca

FORT WALTON BEACH, FL – E homber Arubiano Frederick ‘Rudy’ Franken cu 4 aña pasa tabata sospecha di a hinca su propio yiu RJ di 3 aña mata, e siman aki den Okaloosa County Courthouse na Fort Walton Beach, Florida na Merca a admiti su culpabilidad di loke e la haci 4 aña pasa maart 2019. Cu esaki, e la keda condena pa asesinato premedita den prome grado, y a keda sentencia na bida largo den prison sin posibilidad di apelacion.   E mama, Darelly (Rivera) van Dieren a confirma esaki den forma di exclusividad pa Noticiacla diahuebs. “E tabata un bataya di 4 aña, pero porfin e (Frederick Franken:red), a baha cabez” e mama di e yiu RJ a bisa noticiacla. Mientras cu Rivera ta bisa cu e la perde tur cos incluyendo su carera militar, e ta sigura cu e ta hopi mas fuerte cu nunca. “E capitulo aki a cera y awor mi por sigui cu mi bida. Un capitulo nobo, pero sigur cu mi yiu den mente” van Dieren a sigui bisa Noticiacla. “Semper mi lo hanja falta di mi yiu!” e la sigura e portal aki tambe.  Pa loke ta e caso, segun van Dieren, e intencion tabata pa bay corte dialuna, pa apela, pero e homber sorpresivamente a cambia su declaracion den e sala di corte e siman aki.  

E CASO

Tabata riba 15 di maart na 2019 (cu noticiacla tambe a raporta e tempo ey), cu Darrely a bin haya su yiu homber RJ morto y su casa (e tempo ey) herida den su cas. E homber despues di a hinca su yiu mata, lo a purba pone fin na su bida cu un cuchiu di cushina. Prome cu esey, Franken a manda su casa potretnan di nan yiu durante dia, a saca tur placa di su cuenta di banco, y a post su cellular pa su otro yiu den exterior (Aruba). Djey e la bay cas y hinca su yiu homber mata y purba comte suicidio, pero no a logra. E ora e casa a yega cas, a haya e yiu morto na su cas y e casa herida, pa cual mester a interne den hospital. Despues a detene y a encarcela e homber. Awor cu e admission di culpabilidad, e caso aki ta keda cera y e mama ta cuminsa un capitulo nobo di su bida.