Casi 30 alumno di varios scol a participa den e di 15 edicion di Arte di Palabra Aruba

ORANJESTAD - Diadomingo dia 16 di april ultimo a tuma luga den Cas di Cultura e di 15 edicion di Arte di Palabra (AdP) Aruba, Competencia Literario na Papiamento pa alumno di scol secundario. Arte di Palabra ta ser organisa y subsidia pa Departamento di Cultura Aruba (DCA) y sosteni pa Fundacion Corector di Papiamento (FCP). Durante e competencia aki, 29 alumno di diferente scol avansa a participa cu sea un poema of cuenta cortico existente y/of original. Tambe e aña aki pa di prome biaha tabatin e categoria di Rap, di cual tabatin solamente un participante di EPB kende ta Sergio Garcia, cu a presenta un bunita composicion di su mes titula “Esclavo di mi libertad”. 

Mester bisa cu den cuadro di 160 aña di abolisacion di sclavitud na juli venidero, alumnonan cu ta desea, por a scoge e tema di sclavitud.Prome cu e competencia, e participantenan a ricibi tres tayer bou di direccion di Jhon Freddy Montoya, pa‘sina traha riba nan presentacion, articulacion, expresion y dominio di bos riba stage. 

Scolnan cu a participa ta: Abraham de Veer School, Ceque College, San Antonio College, Colegio Nigel Matthew, Colegio San Augustin, EPI, EPB Sanicolas y John Wesley College. 

Despues di e competencia, por a disfruta di un tremendo show di baile presenta pa “No Image Dance Group” kende ta ganado di e competencia di Gang di Arte 2022, cu tambe ta un proyecto multidisciplinario pa hoben organisa pa DCA. 

Despues di e presentacion di baile, ya e miembronan di hurado tabata tin e resultado cla y nos MC Rafael Garcia, kenda a gana e competencia di AdP Aruba y ABC diferente biaha, a anuncia e finalista y ganadonan.  

Dia 14 di juli venidero, ganadonan di AdP, lo representa Aruba den e competencia interinsular di ABC cu lo tuma luga e aña aki na Aruba.

Por wak mas potret via pagina di facebook Arte di Palabra Aruba y Departamento di Cultura. Tambe por wak e grabacion via pagina di facebook VIP Radio.