ATA: Cobertura negativo internacional cu a nenga artistanan di drenta Aruba, no a afecta Aruba

ORANJESTAD – Aruba no a keda afecta negativamente pa e cobertura internacional relaciona cu e hecho cu algun artista internacional pa drenta nos isla. Asina CEO di Aruba Tourism Authority (ATA), Ronella Croes a sigura Noticiacla. E portal aki mes a conta por lo menos 6 pa 8 relato internacional (Venezuela y Colombia) cu tabata papia negativo di Aruba riba e suseso aki. Asina mes, e CEO a sigura cu toch Aruba no ta Sali malo di esaki. “ATA a bin ta monitorea esaki for di Diasabra. Nos por midi tur esaki a base di diferente indicador” sra Croes a cuminsa na bisa riba e tema. Ora cu a puntra specificamente si nos mester a preocupa cu e publicidad negativo, e contesta tabata “Nada cu a pone cu nos como ATA / Aruba mester haci algo awor”. Pues segun e CEO, Aruba a sali ok di e episodio aki y cu no mester preocupa cu e asunto aki por a afecta nos isla. 

E SUSESO

Tabata for di diasabra den dia cu tabata surgi rumornan cu e artistanan tabatin problema pa drenta Aruba y consecuentemente no lo por a presenta den e concierto e mesun anochi ey, cu segun promotornan, tabata casi completamente bendi. Durante atardi pa anochi e noticia a bin oficialmente di parti di e promotornan cu a confirma cu debi cu tabatin un fayo di comunicacion entre departamentonan di gobierno, cu no a laga e artistanan (cu a yega Aruba si) drenta e isla, y a manda nan bek riba e mesun avion cu nan a bin cune, rumbo pa Colombia. Esaki a pone basta hende disgusta pasobra a cumpra carchi pero no tabatin concierto. 

CONFERENCIA DI PRENSA

Mientrastanto anochi e organisadornan a tene un conferencia di prensa e anochi mes na Harbour Arena, e lugar di e concierto, pa splica un que otro. Nan ta sigura cu nan tabatin tur documento na ordo, incluyendo permiso y cu nan tabata haciendo tur posibel pa logra tene e concierto e siguient dia. Asina representante di e promotornan, Darren van Ommeren a sigura prensa. 

KICO A PASA SEGUN DIMAS

Segun DIMAS su splicacion sinembargo un dia despues, esta diadomingo, den e caso di e concierto di weekend aki lamentablemente e peticion di permiso pa e artistanan di Colombia conhuntamente cu nan acompañantenan a ser entrega den dos batch respectivamente 2 y 3 dia prome cu e evento y a culpa e organisadornan (promotornan) di e fayo y cu esaki pues no tabata na Dimas. 

FUTURO

Pa evita cualkier inconveniencia den futuro DIMAS a haci un apelacion e ora na tur organisador y promotor responsabel di eventonan cu artistanan of personanan cu lo bin for di exterior pa regla tur procedura di permiso cu anticipacion y no menos cu 10 dia laboral prome cu e evento.

E CONCIERTO

Mientrastanto cosnan a keda regla entre diasabra y diadomingo y e artistanan a bolbe Aruba diadomingo mainta pa asina nan por presenta den e concierto cu a keda aplasa cu un dia.