DIMAS: Tanten cu promotor no paga, proceso di permiso no ta cana

ORANJESTAD – Tanten cu promotor no paga, proceso di permiso no ta cana. Esey tabata e situacion basico cu a causa cu cos no a bay bon den fin di siman, segun DIMAS. Despues cu DIMAS diadomingo a reacciona riba e asunto di e cantantenan cu no por a drenta Aruba diasabra ultimo pa presenta pa nan concierto, e promotornan a reacciona cu documentacion pa mustra cu segun nan, nan tabata na tempo y ningun momento a entrega peticion laat y paga laat. DIMAS dialuna riba peticion di noticiacla, a duna mas clarificacion. Segun e vocero di DIMAS, Marilyn Wout, e promotornan a purba entrega e peticion incompleto na cuminsamento di april di e aña aki. “Nan a trece e peticion incompleto e Semana Santa. Nos no a tum’e. Despues e la trece (e peticion) completo pero e tabata laat. Mesun dia nos a dune e orden di pago.” Wout a sigui bisa. 

PROCESO

Wout a sigui splica cu e orden di pago ta duna termino di 7 dia pa paga esaki. E ta keda na cliente ki dia e ta cumpli cu ne. “ Momento cu e peticion ta completo y pago taricibi y cleared door di Departamento di Impuesto (DIMP), e proceso ta start den nos sistema” e la sigui splica. Tambe cu e clearance di e pago tin su proceso. “Hopi biaha clientenan ta tuma esaki lightly, por ehempel: nan no ta paga, paga laat, pago incompleto, paga riba crv of bon robes, of paga suma robes” Wout ta finalisa bisando.