Crecemento den turismo a influencia e entradanan di AZV na 2022

ORANJESTAD - Crecemento den turismo di Aruba den 2022 a influencia e entradanan di AZV di e mesun aña 2022. Esaki a resalta durante e entrega di relato y cuenta annual di e fondonan di AZV pa aña 2022. Di otro banda, e gastonan a resulta 16,5 miyon florin mas cu proyecta. Esaki debi na entre otro cu no a alcansa na implementa e programa di 5 wave manera premira. E bn ta cu danki na e aumento den turismo, e fondo a logra cubri tur su gastonan y minimalisa e contribucion di gobierno na e fondo di 2,9 miyon florin.  

PRESUPUESTO 2022

AZV a cuminsa 2022 proyectando entradanan di prima y BAZV na 460,2 miyon florin, mientras a calcula cu e gastonan total di e fondo lo alcansa 462,9 miyon florin, inclusief recortenan den cuadro di e di 5 wave di COVID19. Esaki lo a nifica cu pais lo mester a contribui cu 2,9 miyon florin.

RESULTADO 2022

E crecemento impresionante di turismo na 2022 a resulta cu na final e entradanan di e fondo tabata 26,7 miyon florin mas cu e proyeccion. Mientras e gastonan a resulta 16,5 miyon florin mas cu proyecta. Esaki debi na entre otro cu no a alcansa na implementa e programa di 5 wave manera premira.

Durante cu e aña tabata avansando a premira un crecemento grandi di e entradanan di e fondo y esaki den combinacion cu e contribucion di sector cuido y di aseguradonan, a logra crea un espacio pa inversion. AZV den deliberacion cu Ministerio di Salud Publico a destina un poco mas cu 9 miyon florin na inversion den cuido di nos pais, manera den entre otro:

-        compra di ambulance;

-        contribucion na Imsan pa atende cu lista di espera den retinologia y ampliacion di cuido di wowo; 

-        contribucion na hospital pa atende lista di espera den e ramonan di radiologia, urologia y gastroscopia;

-        compra di 14 stul nobo di dialyse;

-        contribucion na un software pa conecta dunadornan di cuido, laboratorionan y AZV;

-        contribucion na atende lista di espera pa cu salud mental;

-        contribucion na prevencion.

RESULTADO POSITIVO PA E FONDO

Na final di aña, BAZV a conoce un crecemento adicional cu no a premira. Esaki tabata tin como consecuencia cu e fondo di AZV a conoce un resultado positivo chikito di 1,5%. E resultado chikito aki a keda destina pa inverti bek den cuido den e fortificacion y transformacion necesario di nos sector di cuido, preparando esaki pa e retonan di futuro.

CUADRO FINANCIERO MULTI ANUAL

Final di aña pasa, Gobierno di Aruba a encarga AZV pa desaroya e instrumento di cuadro financiero di mas aña. Esaki como meta pa presenta pa reemplasa e recorte di 60 miyon florin. Sr. Jacobs a informa cu AZV hunto cu expertonan local ta trahando pa presenta e proyecto aki proximamente.

PREOCUPACION

Na final, sr. Jacobs a indica cu mirando cu economia a alcansa bek su nivel di 2019, e tema di migracion ta bira actual atrobe y esey ta presenta su retonan pa e sector di cuido y e fondo di AZV. A palabra cu AZV lo presenta na gobierno su preocupacionnan riba e asunto aki.