Santos Do Nascimento ta cuestiona integridad di AVP

ORANJESTAD – E miembro di partido berde Ryçon Santos Do Nascimento diamars mainta a cuestiona e integridad di e partido cu e ta miembro di dje, AVP. Den un articulo cu e la publica, e ta cuminsa na puntra “ Unda e compromiso di AVP cu integridad ta keda?”. Ademas e ta sigui bisa cu ‘partido AVP mester traha riba un reforma interno cu urgencia”. Y e ta sigui papia riba varios miembro di e partido cu segun Santos Do Nascimento, tin un problema den e partido. Santos do Nascimento algun siman pasa a publicamente exigi un disculpa di colega di partido Mike de Meza pa a 'tir'e bou di bus' den Parlamento, pero te cu siman pasa ainda no a haya tal disculpa. Mientrastanto den su articulo mas recien awe, cos a bay mas leu. Si e tabatin problema cu (declaracionan haci pa ) Mike de Meza so, awor e ta referi na mas miembro. “Echonan di miembronan prominente di partido ta pone cu awe un nubia scur ta tapa tur e gran logronan di AVP. E echonan ey a causa cu awe credibilidad di e partido ta na suela. Tur dia ta confronta candidatonan di AVP cu e acusacion cu e partido ta corupto” Santos do Nascimento ta sigui bisa. Den e articulo, e ta menciona no solamente de Meza, pero tambe Paul Croes y Benny Sevinger, ambos personanan cu a sea keda sentencia pa corupcion, of ta sospechoso, y di cual e ultimo ta tende su destino den corte diaberna awor. Segun Do Nascimento, “ta tempo pa AVP tuma responsabilidad pa su imagen door di bolbe na e norma y balornan di good governance. E partido mester renoba su compromiso cu e vision di Mito Croes pa hisa calidad di gobernacion y politica na Aruba”. Lesa e articulo integral di Santos Do Nascimento AKI.