Corte na Corsou: Ex-top di Ennia y su compania tin di paga 3 miyon florin bek

WILLEMSTAD - Komienso di e siman aki, Korte a dikta sentensia den kual dos kompania di Ennia, esta EC Investments B.V i tambe Ennia Caribe Holding N.V. a entamá kontra di un eks tòp funshonario di Ennia, i su kompania Ralph Palm i R.A.R. Palm Management Services B.V.

Palm tambe ta forma parti di e grupo di Ansary ku algun aña pasa a haña kondena pa sakamentu di sèn for di den e kompania di seguro, i asina debilitá esaki. Otro siman ta plania pa e kaso keda tratá den korte di apelashon.

Sinembargo e kompania di Ennia a disidí pa persiguí Plam i su kompania, mirando kuantu sèn nan a kobra di Ennia di forma inhustu. Den febrüari 2011 entre Ennia Holding i Plam management a sera un akuerdo di maneho, kaminda entrante 14 febrüari 2011, Palm ta bira direktor statutario Ennia Holding, i un aña despues, 1e yanüari 2012 di Ennia Investments. Den aña 2011 te ku 2014, Palm tabatin un kompensashon anual fiho di bónus ku el a haña pa un total di 300 mil dòler òf mas. Ansary ku tabata presidente di e hunta di komisario di Ennia Holding a duna enkargo pa e pagonan aki por tuma lugá.

Riba enkargo di Plam mes den e periodo di yüni 2015 pa aprel 2018 el a haña vorskòt di bónus serka Ennia pa un total di 2.3 mion florin. Den aprel di 2016 riba gastu di Ennia a kumpra un Dodge Durango na rason di 97 mil florin. Den yanüari 2016 Ennia Holding a paga kompensashon di outo na rason di 40 mil florin na Plam management. Den 2017 i tambe 2018 el a faktura anualmente e suma di 26.500 florin inkluso 6%OB.

Na òktober 2015, el a “claim” gastu médiko di klínika na Florida, for di Ennia Holding pa un suma di 25.480 florin na su kompania. Den periodo di 2011 pa 2018 for di Ennia Holding a paga kompensashon di hür na Palm Management na rason di Naf 644.240,-, tambe Ennia Holding a paga gastunan di seguridat den 2013 un suma di 45 mil florin.

Ennia den luna di yüni 2019 a laga pone beslag konservatorio riba vários kompania liga na Palm i esnan kaminda e tabatin partisipashon aden pa medio di akshon, i tambe riba su bienesnan, entre otro su kas.

Ennia den nan demanda ta eksigí pa Palm paga bèk e suma di 3.8 mion florin, i oumentá ku interes. E suma ta tur loke ku Ennia a paga ariba menshoná. Segun Ennia e sumanan aki a keda paga na Palm sin base, sin ku e tabatin derechi riba nan.

Di parti di Palm tambe ta demanda Ennia pa page salario. Segun Palm for di yüli 2018 te ku su retiro e no a haña kompensashon, miéntras su retiro ta te ougùstùs 2018 a drenta na vigor. Mirando su kompensashon pa aña di 300 mil dòler, Plam ta bisa ku Ennia debe su salario di 1e yuli 2018 te ku 18 ougùstùs 2018 pa un suma di 39.526 dòler.

Den e sentensia final wes a rechasá petishon di Palm pa lanta e beslag. Palm a bisa ku e beslag tin un karakter di ekseso kuné. finalmente wes a kondena Palm i su kompania pa paga bèk e suma di 3 mion 318 mil 551 florin oumentá ku interes for di òktober 2109 te ora paga tur kos; pago di Ennia un suma di 532 mil176,92 florin tambe oumentá ku interes. Banda di esaki gastunan di e prosedura na fabor di Ennia pa un suma di Naf 31.854,73, i si no paga den 15 dia e ta oumentá ku interes i igualmente ta oumentá ku gastu di 250 florin, den kaso di “betekening” e suma ta bira 150 florin.

Di otro banda wes ta duna Palm rason pa kobransa di salario. Ennia tin di paga Palm su salario di US$39.516, dentro di 1 siman. NOTA: E texto ta scirbi den Papiamento Fonetico di Corsou.