CBS buscando encuestador full-time part-time pa e Economic Census 2023!

ORANJESTAD - Cuminsando diabierna 14 di April, 2023 Oficina Central di Estadistica (CBS) ta organiza un censo economico esta e “Economic Census 2023”. 

E censo ta toca temanan manera e actividad economico cu companian ta eherce, pero tambe temanan relaciona na empleo manera, cantidad di empleadonan, suma total di salario paga y vacaturanan disponibel. Tambe lo toca e tema di digitalizacion. 

Pa e censo aki ta uno exitoso, CBS ta buscando personanan cu lo desea di fungi como encuestador sea full-time of part-time. Mirando cu e censo ta dirigi riba companianan (entidadnan) cu ta eherce un actividad economico, e orarionan di entrevista ta depende di e dianan y orario di trabou di e entidadnan cu ta bay wordo entrevista.

Pa fungi como un encuestador, mester:

-        por traha cu un Tablet

-        por lesa, scirbi y papia Papiamento, Ingles, Hulandes y Spaño

-        tin por lo menos 21 aña di edad

-        tin por lo menos un diploma di MAVO

-        ta un residente di Aruba (persoonsnummer)

-        tin un rijbewijs valido y un medio di transporte propio

-        ta compromete su mes pa asisti na 2 training obligatorio

-        ta disponibel full-time y/of part-time durante e periodo di 14 di april 2023 te cu 30 di juni 2023

-        ta disponibel pa traha den siman y den weekend.

Tur persona cu ta cumpli cu e rekisitonan menciona por solicita pa ta un encuestador, tanten cu nan ta disponibel durante e periodo menciona.

Pa solicita of pa mas informacion por jama libremente na telefoon: 524-7417 of por manda un e-mail na ec2023@cbs.aw. Lo haya un formulario digital pa yena via e-mail.