Ainda gobierno no tin fecha pa anuncia rebaho di prijs di awa y coriente

ORANJESTAD – Ora cu e companianan di utilidad a anuncia aumento di tarifa aña pasa, esaki a bin cu un promesa cu dentro di 6 luna despues, lo analisa y reduci esaki bek. Mientrastanto e siman aki (diamars) tabata di dos biaha den dos luna di tempo cu minister di energia Glenbert Croes a informa riba e supuesto rebaho di tarifa di awa y coriente, pero no tin nada concreto ainda. E diferencia di e biaha aki ta cu e minister a usa e palabra 'pronto' como e tempo pa anuncia e rebaho bek. Mientrastanto 6 luna a pasa unda cu a priminti cu despues di e tempo ey, lo ahusta e prijs atrobe. Diamars durante conferencia di prensa, envez di tin un contesta concreto cu un fecha, e minister a informa comunidad di un ‘solicitud’ cu su persona a haci na e companianan estatal, WEB, Utilities y Elmar, pa ‘bin cu un proposicion pa cu rebaho den e prijs di awa y coriente’. Pues ainda no tin nada concreto riba ki dia e tarifa lo baha. AHATA tabata mas fuerte ainda na januari ora cu nan a recorda e minister riba su promesa, y a mustra na januari cu nan tabata kier un rebaho dentro di 30 dia. E momento ey tabata e prome biaha cu e mandatario a reacciona y bisa cu ‘ e ta trahando riba e asunto’. Casi dos luna despues pues, ainda no tin e fecha pa anuncia.  

PREOCUPA

E mandatario a purba mustra su preocupacion door di expresa cu ‘gobierno ta comparti e preocupacion cu tin den comunidad pa cu e necesidad pa baha e prijs di awa y coriente y p’esey su persona a solicita un proposicion pa baha e prijs lo mas hopi posibel’. No ta conoci cu si e peticion cu e la haci, tabata for di januari of si ta algo recien cu e la haci.   

COMPROMISO

"Comunidad completo por tin mi compromiso como Minister di Energia cu awa y coriente lo baha bek.  Nos ta warda e proposicion di e companianan estatal pa wak con nos por haci esaki di un forma responsabel y den un tempo corto mirando e urgencia di e situacion” e mandatario a purba sigura comunidad durante su conferencia di prensa. “Loke ta dolor den bo cartera, ta dolor na cas y ta afecta bo yiunan y famia. Nos como gobernante mester busca tur opcion pa trece alivio mientras ta posibel di imediato." Minister Croes a indica.