AHATA kier pa e tarifa di utilidad keda reduci bek dentro di 30 dia

ORANJESTAD – E gremio basa riba turismo, Aruba Hotel & Tourism Association (AHATA) kier pa e tarifa di utilidad (electricidad y awa) keda reduci dentro di e proximo 30 dianan. Asina e presidente di e gremio, Tisa LaSorte ta bisa den un carta cu ta den poder di noticiacla, y ta dirigi na tanto gobierno como e dos companianan di utilidad WEB y ELMAR y UTILITIES. 

CONSIDERACION

E gremio ta splica den e carta cu, considerando cu e peso financiero inmenso cu e aumento di tarifa a pone riba e consumidor local y negoshinan, y e extra peso di aumento di impuesto extra (ta referi na BBO) awor na cambio di aña, nan kier pa esnan responsabel considera e reduccion bek awor.  

CARTA 

AHATA ta referi na un carta cu e la manda un luna pasa (December 2022) na e mesun stakeholders, unda cu nan ta puntra riba e promesa di reduccion di e tarifa di utilidad den 2023 y cu nan tabata kier a sa con a para. Ademas, ta recorda esnan na ken e carta ta dirigi, cu ora cu a anuncia e aumento di tarifa di utilidad, a sigura cu tabata solamente pa 6 luna. Ademas, nan ta mustra cu e prijs pa heavy fuel oil, a baha considerablemente den e prome lunanan di 2022. Tur esaki ta pone cu AHATA ta kere cu ta hunto pa pidi pa bira e tarifanan bek, y pa haci esaki den e proximo 30 dia.