Minister: Ta trahando riba e asunto di reduci tarifa di awa y coriente bek

ORANJESTAD – Gobierno hunto cu e companianan di utilidad tin atencion pa e situacion di tarifa di awa y coriente. “Nos ta trahando riba dje” e minister encarga cu energia Glenbert Croes a bisa noticiacla diaranson brevemente, como reaccion riba e carta cu AHATA a manda e siman aki. E carta di AHATA tabata recorda esnan encarga pa reduci e tarifa di utilidad (awa y coriente) bek, awor cu 6 luna a pasa. Mientrastanto diahuebs mainta, e mandatario a amplia su reaccion na e portal aki splicando adicional cu e tabatin un reunion pendiente cu e companianan en cuestion y despues por a duna un contesta mas concreto. “Nos ta atendiendo e tema aki si. Paso despues di 6 luna lo mester evalúa”, admitiendo cu enberdad a keda pa ahusta e tarifa. Pero aki e mandatario ta bisa cu ‘mester a evalua’, contrario na e pensamento di AHATA cu automaticamente mester a cambia e tarifanan bek. 

AHATA SU ‘PETICION’

Tabata e siman aki cu AHATA a manda un carta pa esnan concerni riba e tema. E gremio basa riba turismo, Aruba Hotel & Tourism Association (AHATA) tabata kier pa e tarifa di utilidad (electricidad y awa) keda reduci dentro di e proximo 30 dianan. Asina e presidente di e gremio, Tisa LaSorte a bisa den e carta cu ta den poder di noticiacla, y tabata dirigi na tanto gobierno como e dos companianan di utilidad WEB y ELMAR y UTILITIES. 

CONSIDERACION

E gremio a splica den e carta cu, considerando cu e peso financiero inmenso cu e aumento di tarifa a pone riba e consumidor local y negoshinan, y e extra peso di aumento di impuesto extra (ta referi na BBO) awor na cambio di aña, nan kier pa esnan responsabel considera e reduccion bek awor.  

CARTA 

AHATA a referi na un carta cu e la manda un luna pasa (December 2022) na e mesun stakeholders, unda cu nan ta puntra riba e promesa di reduccion di e tarifa di utilidad den 2023 y cu nan tabata kier a sa con a para. Ademas, a recorda esnan na ken e carta ta dirigi, cu ora cu a anuncia e aumento di tarifa di utilidad, a sigura cu tabata solamente pa 6 luna. Ademas, nan ta mustra cu e prijs pa heavy fuel oil, a baha considerablemente den e prome lunanan di 2022. Tur esaki a pone cu AHATA ta kere cu ta hunto pa pidi pa bira e tarifanan bek, y pa haci esaki den e proximo 30 dia.