Telearuba ta transmiti Serie di Caribe via ‘Nos Pais Television’ pa wak seleccion reforsa di Corsou cu Aruba
ORANJESTAD—Canal di televishon Nos Pais i su direktora Mavis Albertina, awe tardi durante un rueda di prensa a anunsiá cu islanan Aruba, Corsow, Boneiro y Sint Maarten, pa promé biaha den historia, por mira selekshon di Corsow reforsá cu peloteronan tambe di nos partisipá na un Serie di Caribe di beisbòl. E kanal di televishon ofisialmente a atkerí derechinan eksklusivo pa transmishon di tur wega durante e torneo di beisbòl mas grandi den Caribe i Latino America.
Serie di Caribe 2023 ta un evento deportivo di beisbòl profeshonal cu lo tuma lugá di 2 pa 10 di februari 2023, na Venezuela den stadionnan La Rinconada (Caracas) i Forum (La Guaira). E Serie ta reuní den un torneo final, ekiponan campeon profeshonal di Venezuela, Repúblika Dominikana, Cuba, Puerto Rico, Mexico, Panamá i Colombia. I pa promé biaha den historia Corsow ta partisipá.
E clásiko Caribense i latino amerikano ta drenta su di 65 edishon i pa Corsow esaki ta un desaroyo histórico. Corsow ta hunga un kantidat di 7 wega preliminar durante e promé rònt i cu bon resultado lo hunga rondnan di ‘play off’: (adhunto conekshon di e calendar i website oficial)
https://www.Serieedelcaribe.net/articulos/calendario-Seriee-del-caribe/
https://www.Serieedelcaribe.net/
Nos Pais Television, den un logro históriko i exclusivo ta trese tur 32 wega durante Serie di Caribe, te den boso kas. E posibilidat a bira un realidad na momento cu direktora di e planta, Mavis Albertina a firma cu representante di e Confederashon di Beisbòl Profeshonal Caribense. Un grupo bastante grandi di hungadónan profeshonal yiu di Corsow na Estádos Unídos i demas kampeonatonan internashonal a konfirmá nan partisipashon, inkluso Jonathan Schoop, Jair Jurrjens, Shairon Martis i Andrelton Simmons. I di Aruba Ray Patrick Didder i Ryan Hunington.
E hecho cu peloteronan di Aruba ta duna nan aporte na e team di Corsow ta algo di aprecia hopi. Motibo pa cual Mavis Albertina como gesto di agradesimiento, a join forsa cu Tele-Aruba i tuma e desishon pa brinda e Pueblo di Aruba tur 32 wega completamente gratis. Canal 23 (Nos Isla) lo carga e señal den kadena cu Nos Pais i ta transmití tur 32 wega. Meskos ta konta tambe pa Nos Pais su canalnan na Telbo Boneiru, i Telem i WTN na Sint Maarten.
Nos Pais alabes ta gradici su patrosinadónan di e projecto histórico aki, cu ya kaba a konfirmá nan sosten manera entre otro Aruba Bank, Guardian Group Fatum, Ministerio di Enseñansa, Siensia, Cultura i Deporte i Curoil. Finalmente un pabien i danki ta bai pa e pueblo di Corsow cu e gran logra aki.
E Team di Transmishon na Venezuela pa kanal Nos Pais ta kargá cu eksperensia internashonal. E ta consisti di naradonan Alexander Makaja, comentarista Clarck Zalm kendenan lo biaha huntu cu técniconan, Robert Emperador i Tom Allen pa Venezuela. Na Corsow den studio e team ta risibí sosten di Gino Valeriaan, Jair Quand i Rafelito Jozefa. Tambe Edson Kelly di Aruba i Cumar Piar di Boneiru lo reforsá e team. E cas produktor di contenido, KONTENTU ta enkargá cu planifikashon i ehecushon logístiko di e projecto na Venezuela.
CMB a entrega donacion di Urataka Run & Walk 2023
Aruba Paralympic Committee a colabora cu proyecto Ami tambe ta Campeon!
ORANJESTAD - E team di Aruba Paralympic Committee (APC) y team di IBiSA a colabora cu otro den e proyecto “Ami tambe ta campeon!”. Un proyecto cu ta pa stimula e scolnan pa muchanan cu limitacion tambe participa den deporte escolar. E biaha aki e competencia a tuma lugar den e siman di 16 -20 januari 2023. Segun e comitiva, ta di admira e entusiasmo cu e muchanan tin pa participa den deporte pero tambe ta aplaudi e scolnan cu ta keda encurasha e muchanan pa participa. Den cuadro di e proyecto “Ami tambe ta campeon” e dos atletanan Raynar Herrera di Colegio Nigel Matthew y Kayleen Petrochi di Scol Soeur Juliette ta e prome atletanan cu ta forma parti di e proyeto aki. Kayleen ta e prome atleta pa competi den rolstoel pa careda na stadion Guillermo Trinidad. Esaki sigur ta algo di aplaudi y ta un estimulo pa tur otro alumnonan cu tambe ta den rolstoel participa den deporte. E rolstoel di deporte aki lo ta disponibel pa tur mucha den rolstoel por usa. Cu sosten di e Marlou van Rhijn foundation, APC por a logra hanja e stoel aki pa mas mucha na Aruba por usa. Si tin interes por tuma contacto libremente cu APC na 6998300 of por email na [email protected] IBiSA y APC lo sigui stimula mas muchanan cu limitacion pa bin participa den school sport y ta parti di e proyecto "Ami tambe ta campeon!".
Dos hoben Arubiano a firma cu ekiponan di Grandes Ligas di baseball Mericano den weekend
ORANJESTAD – Den fin di siman dos Arubiano hoben a keda firma pa un oportunidad den baseball Grandes Ligas di Merca. Ta trata di Joan Sierra cu a firma cu San Diego Padres y Joenelly Van Der Linden cu a firma cu Pittsburg Pirates. Ambos ta ambiciona e posicion di short stop. Mester bisa cu van der Linden ta un di e 22 hungadornan cu e ekipo a firma diadomingo. E periodo pa firma hungadornan prospecto nobo a habri dia 15 (ayera) y riba e prome dia, a firma e dos localnan aki caba. Ta trata di un total di 30 ekipo cu por a firma hungadornan nobo. Ningun di e hungadornan sinembargo aki ta oficial, te ora cu nan firma nan contracto y completa nan test fisico y keda aproba pa e oficina di e comisionado. Den caso di esnan di Aruba, nan a firma caba, y falta e test fisico solamente. E period di firma ta finalisa te 15 di December di e aña aki. NOTA: Potret cortesia di 297 Sports.
E prome careda di aña a tuma lugar, Urataka Run & Walk patrocina pa CMB
ORANJESTAD - Cu mas di 700 participante y un record di tempo cu a wordo supera, diasabra dia 14 di januari ultimo e prome careda di coremento di aña Urataka Run & Walk a haci su regreso den curazon di Santa Cruz. Un evento yena cu ambiente, Caribbean Mercantile Bank N.V. conhuntamente Urataka Center, ta marca e di 23 edicion di e evento deportivo aki.
Aruba, Boneiro, Curaçao y Sint Maarten den proyecto deportivo Serie del Caribe 2023
ORANJESTAD - Aruba, Boneiro, Curaçao y Sint Maarten ta participa den proyecto deportivo Serie del Caribe 2023. Asina a keda participa den un conferencia di prensa recientemente na Corsou. E canal di television Nos Pais Television di Curaçao a adkiri oficialmente e derechonan exclusivo pa transmiti wega durante e torneo di baseball mas grandi den Caribe y Latino America. TeleAruba canal 23 ta carga e señal den cadena cu Nos Pais Television, pa asina transmiti e wega pa e pueblo di Aruba. Serie del Caribe 2023 ta un proyecto deportivo di baseball profesional cu ta tuma luga di 2 pa 10 di febuari 2023 na Venezuela. Ekiponan campeon y profesional di Venezuela, Republica Dominicana, Cuba, Puerto Rico, Mexico, Panama y Colombia ta participa y pa prome biaha den historia e islanan di Aruba, Boneiro, Curaçao y Sint Maarten ta bay participa. Profesionalnan di Aruba den e deporte di baseball cu ta biba den exterior, manera sr. Patrick Didder y sr. Ryan Hunington a confirma nan participacion den Serie del Caribe 2023. TeleAruba lo transmiti un total di 32 wega di Serie del Caribe. Narado sr. Edson Kelly di Aruba ta reforsa e transmision hunto cu narado di Curaçao y Boneiro.
Xander Bogaerts a despidi di Boston y Boston Red Sox via instagram
BOSTON – Manera ta conoci awor, e pelotero professional di Aruba Xander Bogaerts a firma cu San Diego Padres pa e proximo temporada di baseball professional mericano. E siman aki e la oficialmente despidi cu un mensahe, unda cu e la permanece pa 15 aña di su carera professional. E mensahe a keda postula riba su cuenta di Instagram.
Follow NoticiaCla
