KPA: Polis ta cera ruta dos ora prome cu Parada di Flambeu diasabra

MACUARIMA -  Polis diasabra awor pa Parada di Flambeu ta cera e ruta 6:30pm y lo tin control! Manera ta conoci, diasabra awor 7 januari 2023, Aruba lo presencia su prome parada di Carnaval 69. Esaki nifica tambe cu departamento di trafico y planologia conhuntamente cu DOW lo cera e ruta di Parada di Flambeu. 

RUTA

E ruta no a cambia. Parada di flambeu ta cuminsa na ex-Kooyman ariba Avenida Milio Croes y ta termina na ex -DOW na Paardenbaaistraat. E camindanan cu lo wordo cera pa trafico y pa seguridad di tur persona ta lo siguiente: Ta cuminsa cera for di Altura di Aruba Entertainment Center ariba Avenida Milio Croes direccion retonde Banco di Caribe, despues ta sigui riba Vondellan direccion rotonde Las Americas, pa despues bay direccion pabou riba L.G. Smith Blvd te cu retonde de Wendy’s.

PONE STOEL

Diasabra despues di 4 or atardi por pone stoel, banki y no prome! Y manera parada caba mester ruim op y bay cu tur bos bek. Tene bon cuenta cu lo tin persona di Polis y DOW riba caminda publico! Riba e mesun dia aki for di trempan Cuerpo Policial Aruba lo controla full e ruta di Parada di Flambeu. Lo percura pa orden publico y tambe tur obheto of auto mal para riba caminda of cu ta blokia e crusadanan lo wordo confisca.

SI TAKEL BO AUTO

E autonan cu wordo getakel , doño di e auto mester bay warda di Oranjestad pa asina paga e gasto di takelwagen y administrativo. Por swipe solamente na Warda di Polis, no ta tuma placa cash.  Despues di parada no lo por haci esaki mas y lo mester bay bek te dialuna na warda di Oranjestad pa asina paga e gasto plus e dia cu e auto a keda para na warda di polis.