LaSorte (AHATA): Atake contra turista ta tambe atake riba nos economia

ORANJESTAD - Crimen violento semper ta un shock den nos comunidad, y ora e tuma lugar contra un turista e ta un atake no solamente contra e persona pero tambe contra nos economia. Asina CEO di AHATA Tisa LaSorte a bisa noticiacla.com diahuebs mainta, den cuadro di e atake di tres persona contra un turista Canades fin di aña aki na Aruba, cu a laga e turista basta herida. Ayera a bira conoci cu autoridad policial a detene tres persona responsabel pa esaki. Y mirando cu ta trata turismo, nos unico pilar real economico, e ta preocupa e asosacion AHATA. 

CRIMEN CONTRA ARUBA

Segun LaSorte, un crimen contra un turista ta un crimen contra henter Aruba cu ta depende di turismo. Di otro banda, LaSorte tabatin palabra di elogio pa e trabou rapido di autoridad. “ Nos ta contento cu polis ta actuando rapido pa aresta e personanan cu a comete e crimen y nos ta conta riba nos sistema di husticia pa saca e tipo di personanan aki for di nos sociedad” e la cuminsa na bisa. “Nos ta spera tambe cu Aruba  por logra mas vigilancia di ekipo di seguridad y polis y mas prevencion di crimen” e CEO di AHATA a finalisa bisando awe mainta.