Miss Aruba a sali pa cede di Miss Universo pa e certamen final aki 2 siman

NEW ORLEANS – Representante di Aruba pa e certamen di Miss Universo Kiara Arends a sali diadomingo ultimo pa e cede di e certamen, na New Orleans, estado di Louisiana na Merca. E la sigura durante un entrevista cu e canal Telearuba na su salida na aeropuerto, cu e ta cla pa e meta y ta determina pa trece e corona pa Aruba. E lo representa Aruba den e di 71 edicion di e certamen, cu lo tuma lugar na e New Orleans Morial Convention Center, dia 14 di januari proximo, unda cu 85  participante lo competi pa posicion maximo. Te awor, ta Taryn Mansell y Maureen Leenheer-Vieira a yega mas halto pa Aruba den e certamen su historia (respectivamente 1e y di 4 finalista). Mester menciona cu Aruba ta figura den e ‘mencionan’ popular hunto cu -Corsou den e pronosticonan. E certamen a cambia di doño y awo esaki lo conoce varios cambio tambe e anochi final. E ultimo Miss Universo, Harnaaz Sandhu di India lo corona su successor riba e anochi final. Mester bisa tambe cu tin 9 pais cu a cay afo, manera Dinamarca, Hungria, Irlandia, Israeal, Kenya, Kazakhstan, Morocco, Rumania y Suecia. Potret cortesia Telearuba.