Minister Croes a firma e decreto pa aumento di salario minimo pa 2023

ORANJESTAD – Aumento di salario minimo pa 2023 ta un hecho. “Mi a cabi firma e decreto pa aumento di salario mínimo entrante 1 di Januari 2023 como Minister di Labor Energia y Integracion” minister Glenbert Croes a pone riba su pagina di Facebook diamars mainta. Segun e mandatario, aumento di salario mínimo dor di Gobierno di MEP 2001 - 2009 tabata total 431 florin. Y e la recorda tambe cu den 5 anja Gabinete Wever Croes 1 y 2 a aumenta salario mínimo ‘caba’ cu 216.06 florincu por implica cu lo tin mas aumento den e proximo añanan.  

MENCION ‘INOFICIAL’

Tabata siman pasa ainda cu noticiacla a raporta e suma, despues di a tuma nota di esaki den e reunion di Parlamento riba pasament di ley pa aumenta BBO den 2023.  Tabata despues di hopi anticipacion, cu gobierno di Aruba un siman pasa (diaranson:red)  a anuncia e aumento exacto di salario minimo vigente entrante 1 di januari 2023. Durante e reunion publico unda cu a trata e cambio di ley di reforma pa aumenta BBO, e mandatario encarga cu finanza Xiomara Maduro a informa cu e salario minimo lo aumenta cu 4.3%. Calculando esaki, di e salario minimo actual conforme e portal di gobierno di Aruba, (AWG 1815,35:red), esaki ta bira un aumento di 78 florin pa luna, of 18,21 florin pa siman. 

ULTIMO AUMENTO

E ultimo aumento di salario minimo tabata 1 di januari 2020, y awor tres aña despues, gobierno ta bolbe aumenta esaki. Notable ta cu e anuncio no a bin di minister di labor Glenbert Croes, sino di e minister colega, cu tabata ‘contestando’ preguntanan y a dal bay pa contesta e pregunta. E la remarca si cu su colega minister Croes lo haci e anuncio ‘oficial’ proximamente. 

ANUNCIO SIN CIFRA

Tabata pa varios siman caba cu e portal aki tabata pendiente pa e suma exacto, unda cu e mandatario en cuestion, Glenbert Croes a sigura e portal aki cu e aumento ta un hecho, pero cu tabata wardando e ultimo consehonan pa determina exactamente cuanto esaki lo ta. Por nota cu e colega minister a ‘delanta’ e noticia, porta sin intencion pero cu na final a bira conoci si kico e cantidad ta.