Lansamento di satelite di tempo, cu Edward Cheung a traha ariba, a keda posponi temporalmente

CALIFORNIA – E satelite di tempo cu mester a keda lansa diamars awor (mayan) for di California, a keda posponi te por lo menos November 9. Loke ta haci e lansamento aki special, ta cu nos arubiano Edward Cheung ta responsabel pa parti di e proyecto aki y a yuda traha riba dje. Actualmente e ta na e base, Vandenberg Space Force Base, for di unda lo mester a lansa e satelite via un raket. E satelite di tempo (weather satellite)  yama #JPSS2,  pero unabez lansa den espacio, ta cambia su nomber pa #NOAA-21. 

LANSAMENTO 

Manera cu Cheung a confirma pa noticiacla dialuna, e lansamento ta posponi. “Esey ta ora cu e raket mes lo ta cla. Pero e ekipo cu ta coordina tur lansamento na merca, tin cu aproba e fecha. 

TAREA DI CHEUNG

Cheung su tarea, despues di tabata envolvi den creacion di e satelite, (cu ta parti di e carga di e raket), durante lansamento ta pa ta e ‘bombero’ ingeniero electrico. Den caso di fayonan durante tests cu e nan ta conduci, nan ta yame pa guia e ekipo na e sitio pa compronde y resolve e problemanan. Cheung tin hopi experiencia cu e parti aki tambe. Por cierto, Cheung a clarifica cu e retraso di lansamento no ta pa motibo di e raket mes, sino e booster cu ta e forza cu ta propulsa e raket den espacio.