Aruba Happy One Pass mester haci experiencia di turista na Aruba mas placentero
ORANJESTAD – E asina yama Aruba Happy One Pass/Seamless Travel mester haci experiencia di turista na Aruba mas placentero. Asina e minister encarga cu turismo, Dangui Oduber a bisa diahuebs mainta durante e lansamento di e ‘app’ aki. Segun e mandatario, esaki ta un proyecto cu ya pa basta tempo ta trahando riba dje cual lo bay crea un experiencia mucho mas placentero pa e turistanan cu ta bishita nos isla. Con e app ta traha exactamente, mester keda splica ainda si.
Minister Oduber a menciona cu ya caba pa un tempo ta trahando den bon colaboracion cu e compania SITA y demas stakeholders pa haci e proyecto di Aruba Happy One Pass/Seamless Travel un realidad. E proyecto aki lo bay yuda na promove nos turismo, e lo transforma e experiencia di cada un bishitante, ofreciendonan e miho calidad di servicio prome cu nan stap den e avion rumbo pa nos isla.
E mandatario a splica cu durante e prome fase di e “Seamless Travel Experience”, Aruba lo ta trahando di serca cu e aerolineanan pa optimalisa e procedura di check in inicia pa e pasahero. Despues di esaki e informacion di e pasahero lo pasa door di e systema di SITA cual lo check mesora si esaki ta cuadra cu e informacion cu Gobierno tin aproba riba e ED card. Esakinan ta e prome pasonan pa sigura un experiencia mas confortabel y lihe pa nos bishitantenan.
Minister Oduber ta sigur cu na momento cu esaki keda completa, e introduccion caminda por biaha cu credencialnan digital lo bay atrae mas turista. Esaki tambe lo bay pone Aruba como e frontline den innovacion y progreso den henter industria di turismo y hospitalidad mientras nos ta keda proteha e calidad di e producto Aruba.
Wever: Ley pa proteccion di e consumidor a keda cla
ORANJESTAD - Diamars ultimo Conseho di Minister, riba peticion di Minister Geoffrey Wever, a aproba e ley nobo pa proteha e consumidor. E ley nobo pa proteha e consumidor awo a keda aproba y lo sigui su caminda pa Raad van Advies. Aruba no tawata conoce un ley pa proteha e consumidor, pero awo cu e aprobacion di e ley nobo aki e consumidor lo haya e proteccion cu e mester.
Arends: A traha plan pa enfrenta e Desafio di Dubbele Vergrijzing
ORANJESTAD - October ta luna di Adulto Mayor, un luna dedica pa honra nos adultonan mayor y pone enfoke riba e reto y necesidadnan cu nan ta encontra. Minister di Asuntonan di Adulto Mayor ta elabora ariba e bienestarnan di nos adultonan mayor, mirando e crecemento continuo di e populacion di 60 aña y mas, y tambe e fenomeno di "dubbel vergrijzing" cu ta un aumento di persona cu ta pasa di 80 aña.
Muchanan di klas 3 lo tin e oportunidad di gana e di 800 mil "Dieren Diploma"
ORANJESTAD - Dia 4 di october ta Dia di Bestia, y ta un dia pa para keto na tur e mascotanan, y e responsabilidad cu ta bin ora cu un persona scoge pa tin un mascota na su cas. Prome Minister Evelyn Wever-Croes a splica cu ta hopi importante pa na momento cu bo tin un mascota, pa e wordo cuida debidamente. Tambe ta importante pa cada mayor sigura cu nan yiunan na un edad trempan, sa e importancia y responsabilidad di tin un mascota.
DBB: Tur persona di nacionalidad Hulandes of residencia na Aruba mester bandona Libanon
ORANJESTAD – E siman aki Directie Buitenlandse Betrekkingen (DBB) a pidi tur persona di nacionalidad Hulandes of residencia na Aruba pa bandona Libanon. Segun e departamento, esaki pasobra e situacion di siguridad na Libanon ta bira mas insigur cada dia. Gobierno di Reino Hulandes a bin ta studia e situacion na e paisnan Libanon y Israel di cerca y a comunica e consehonan di biahe via www.nederlandwereldwijd.nl. Na mes momento ta mira cu ta birando mas y mas dificil pa ciudadanonan Hulandes sali for di Libanon.
Wever: Ta inverti 270 mil pa 100 luz mas den Oranjestad pa mantene e zjeito di e area!
ORANJESTAD - Despues cu den luna di juni a cuminsa cu limpiesa di caya grandi, ta sigui cu instalacion di barinan di sushi y instalacion di 100 luz adicional y asina contribui positivamente na e seguridad y limpiesa den nos centro di ciudad, segun Minister Geoffrey Wever. Un inversion di mas cu 270 mil Florin adicional den nos centro di ciudad, e luznan ta esteticamente "clasico" y bunita pa mantene e zjeito di e area, y ta provee mas iluminacion compara cu e modelonan anterior. Tur inversionan adicional pa nos centro di ciudad ta parti di un strategia holistico pa revitalisa Oranjestad y hasi nos capital mas comercialmente atractivo.
Wever: Hulanda lo asisti Aruba cu e desaroyo di e industria agricola comercial
ORANJESTAD - Minister Geoffrey Wever a anuncia cu pronto lo cuminsa cu un estudio riba e tipo di ‘greenhouses’ mas ideal, cultivonan prometedor y sondeo di metodonan di cultivo den agricultura comercial na Aruba. Esaki ta un otro colaboracion cu lo tuma luga hunto cu Hulanda como parti di e maneho di Ministerio di Asuntonan Economico, Comunicacion y Desaroyo Sostenibel pa e desaroyo di industria agricola como un pilar di nos economia. Resultado di e estudio lo bira parti di e maneho pa stimula e industria agricola.
Follow NoticiaCla
