Van Huffelen: Tin palabracion cu RMR cu Aruba mester logra surplus na 2023

DEN HAAG/ORANJESTAD – “Ta hopi importante pa Aruba logr’e!” tabata palabra di secretario di estado hulandes Alexandra van Huffelen na NoticiaCla diabierna mainta, refiriendo na e hecho cu Aruba mester logra un surplus di 1% riba e presupuesto 2023. Esaki e mandatario a bisa durante un conferencia di prensa cu e mandatario a duna despues di e RMR, unda cu a dicidi pa no duna Aruba un instruccion (aanwijzing). Aruba den pasado recien a bisa caba cu e no ta logra esaki sino te na 2026 of 2027. 

ARUBA A COMPROMETE SU MES

Mientras cu e mandatario hulandes ta admiti cu e lo ta henter un esfuerso pa logra e meta ey, e ta recorda Aruba tambe cu a haci ‘afspraak’ caba den e RMR anterior cu Aruba ta bay logra e 1% surplus riba su presupuesto di 2023. Y a palabra tambe cu ta bin e RAFt (envez di e LAFt y e protocol) actual pa controla esaki. Algo cu tambe Aruba a bringa mirando e contenido cu por mina e autoridad di Parlamento di Aruba. “Nos ta keda den contacto riba e tema aki” e mandatario a bisa, y cu tin tempo ainda pa logra e meta ey. Pero cu Aruba tin cu logra esaki, ta sin mas.

GOBIERNO TA SERIO OF NOContestanto e portal aki, e mandatario a bisa cu e ta tuma e gobierno di Aruba hopi na serio. E pregunta tabata a base di e hecho cu gobierno di Aruba no tin e miho ‘track record pa loke ta tene su mes na palabracion. Algo cu Hulanda y CAFt constantemente ta bisa. “Wel, nos a mira cu,- loke cu CAFt a constata tambe, cu gobierno a pospone varios tema y of no a implementa nan”. Aki e mandatario ta referi riba cosnan cu Aruba no kier of no a implementa ainda manera BTW, siendo cu e la priminti cu esaki lo a sosode. “Pero esey no kier men cu ainda nan no por haci esaki (refiriendo na e BTW)” e mandatario a sigui bisa. “No sigui cu decisionan tuma por, pero mester wak con bo ta tuma bo siguiente pasonan” e mandatario a bisa, indicando cu  e por tin consecuencia si decisionan tuma, no wordo sigui toch despues. “Hulanda ta keda optimista pa cu e futuro, y hunto cera acuerdo cu por mehora bida di tur hende”, e mandatario a finalisa bisando.