Rotonde Palm Beach den finalisacion pero habri pa comunidad

ORANJESTAD - Fin di siman comunidad cu ta haci uzo di e area di Palm Beach por a experiencia mehoracion den e situacion di trafico. E rotonde di Palm Beach a wordo habri pa trafico por haci uzo di dje. E trabounan lo finalisa fin di luna, pero ja caba e rotonde ta habri pa trafico di ambos direccion haci uzo di dje. Cu e rotonde completa, ta logra trece mas alivio den trafico den e area y specialmente trece seguridad den trafico. Prome cu a tuma e decision pa construi un rotonde na e area aki, tabatin un crusada grandi cu tabata hopi insigur. 

MARLON CROES DIRECTOR DOW

Director di DOW a splica cu e crusada cu tabatin antes tabata un punto debil den Aruba su infrastructura. Prome cu a cuminsa cu construccion di e rotonde, a pone plataforma na e sitio como solucion temporal. Awo cu e rotonde ta cla e ‘lane’ parti paden lo wordo cera pa e contratistanan su empleadonan por traha na un manera sigur riba e parti memey di e rotonde y pa 23 di september e proyecto lo ta definitivamente cla. 

Gobierno su prioridad ta pa e careternan ta sigur y pa aumenta comfortabilidad den bida di cada ciudadano. Ta gradici e contratista cu ta Arubaanse Wegenbouw Maatschappij cu a traha duro hunto cu  ekipo di DOW pa realisa e proyecto.