Hues: Sevinger tabata un ‘stempel machine’ firmando tur tereno erfpacht

ORANJESTAD – Awe diaranson mainta, hues a confronta sospechoso principal pa e caso penal Avestruz, e parlamentaro Benny Sevinger. Rapidamente, scuchando e forma facil con Sevinger tabata anda cu peticion y posibel aprobacion di tereno, a yama Sevinger un ‘stempel machin’. “Bo ta un tipo di stemple machine” hues a bisa Sevinger, riba cual Sevinger a responde rapidamente ‘Ja!”. Pero su tras, Sevinger su argumento ta cu e no tabata bisa no na ningun peticion, pa evita cu e ta wordo acusa di hunga favoritismo politico. 

RELACION CU DIP 

Rapidamente, hues y Sevinger a conclui tambe cu e comunicacion y relacion cu entre DIP y e oficina di minister no ta(bata) esun di mas miho, ya cu ‘segun declaracionan’ constantemente tabatin contradiccion entre e dos partidonan. P.e, Sevinger ta sigura hues cu mientras cu e ta firma ok pa tur peticion di tereno, e realidad ta keda si cu DIP ta esun cu finalmente ta dicidi si tur cos realmente ta na ordo. Hues sinembargo a confronta Sevinger pa splica e ora pakico DIP di su banda, tabata bisa cu ora cu nan haya un peticion di tereno cu firma di e awor ex minister, DIP su contesta durante interogacion tabata, cu un firma di minister tabata wordo interpreta como un si di minister osea un instruccion, pues no por haci nada otro sino aproba. “Esey no ta berdad”, Sevinger constantemente tabata bisa hues.

HUES TA CUESTIONA E PROCESO

Hues dado momento a puntra Sevinger pa splica e proceso y si ta posibel cu si un hende bin directamente cerca Sevinger pa un tereno, esey tambe por?,. Sevinger a ripiti cu si, cu ken cu bin ta haya contal cu tin si pa duna. “Tur hende ta haya un chens!” Sevinger a sigura, pero cu DIP tin ultimo palabra y no e. Aki ta unda cu hues a pasa pa yama Sevinger un stemple machin. E hues a confronta Sevinger cu algun documento cu tabatin aprobacion di Sevinger, pero cu no a pasa DIP. Sevinger no por a contesta esey.”Mi no sa pakico!” e la contesta. Sevinger a bay asina leu di yama DIP un aparato politisa.

OMOra cu tabatin e intercambio ey entre hues y Sevinger, fiscal di Ministerio Publico a cuestiona Sevinger y puntra si e por comproba por escrito cu e tabata enberdad un stemple machin. “Bo a bisa aworey cu enberdad bo ta un stemplemachin. Esey ta stipula conforme un maneho? E ta stipula asina?” e fiscal a keda puntra. “No por escrito!” Sevinger a contesta e fiscal.