Gobernador di Aruba a tene recepcion di despedida pa Gobernador saliente di St Maarten

ORANJESTAD  - Na ocasion di Gobernador di Sint Maarten su ultimo bishita di trabao pa Aruba, Gobernador di Aruba, S.E. Alfonso Boekhoudt a organisa un recepcion di despedida pa S.E. Eugene Holiday. Diferente dignatario, entre otro Ministernan y Miembronan di Parlamento di Aruba a haci uzo di e oportunidad pa despedi di Gobernador di Sint Maarten. 

Gobernador Holiday ta e prome Gobernador di pais Sint Maarten y ta eherce e funcion desde 10 di october 2010. Durante su periodo como Gobernador, Excellence in Governance tawata central. Den su discurso Gobernador Boekhoudt a gradici Gobernador di Sint Maarten pa su esfuerzonan incansabel durante di e ultimo 12 añanan cu e tawata den funcion. Tambe a gradici’e pa e colaboracion semper agradabel y pa su compartimento di conocemento y experiencia durante di e periodo nan a traha hunto.  

Como regalo di despedida, Gobernador Holiday a ricibi un estadua di brons di un palo Divi Divi, traha pa e artista local Ciro Abath. Potret cortesia Kabnbete Gouverneur Aruba