A.T.A. a tene estudio riba impacto di subida di costo riba demanda di turismo pa Aruba

Posted on 08/5/2022 8:51 am AST | Updated on 08/5/2022 1:43 pm AST

ORANJESTAD - Aruba semper a posiciona su mes como un destinacion cu prijsnan mas eleva y a sa di ta exitoso den esaki. A.T.A. lo sigui haci esfuerso pa dirigi su mes riba e tipo di turista cu ta dispuesto pa paga e prijs aki y ta mira e balor di esaki, sinembargo ta considera cu mester investiga ki impacto un incremento den prijs lo tin riba e demanda pa un vacacion pa Aruba y keda monitorea esaki. Tambe ta señala, un biaha mas, cu ta importante pa enfoca riba brinda nivel di “value for money” adecua! Esaki a bin ta bou di presion.

Pa algun luna caba A.T.A. a bin ta den dialogo cu mas di 75 diferente socio; organisacionnan, departamento di gobierno y gremionan na Aruba y den reino, enfocando riba diferente tema cu tin impacto entre otro riba turismo y e costo di vacacion, algo cu lo afecta un biaha mas directamente e forma di biba di cada un aki na Aruba.

Mirando e importancia di turismo y recuperacion economico como destino y nacion, A.T.A. a enfoca riba 3 estudio, pa asina por duna conseho riba decisionnan, basa riba investigacionnan y pues “facts”.

Den luna di April, a completa e ‘Price Competitive Study’, unda ta compara e costo di un vacacion pa un un bishitante di Estados Unidos – siendo e mercado primario – pa Aruba cu e costo di un vacacion pa otro destinonan den Caribe. E meta di e estudio aki tawata pa wak pa diferente tipo di vacacion manera biahe cu famia, honeymoon y biahe di pareha cuanto e prijs pa persona lo sali pa e diferente elementonan di cada tipo di vacacion, por ehempel buelo, acomodacion, cuminda y bebida, transporte y actividadnan. Den caso di un biahe cu famia, e prijs pa persona pa Aruba ta significantemente mas halto den comparacion cu e otro islanan, den caso di un biahe pa honeymoon, e prijs pa persona pa Aruba tambe ta mas halto den comparacion cu e otro islanan y den caso di un vacacion di pareha “empty nesters” e prijs pa persona pa Aruba ta na di 2 luga mas halto despues di U.S. Virgin Islands. Esaki no ta un sorpresa, pero ta bon pa

re-establece con ya caba Aruba ta carga un prijs mas eleva y pues mester actua cu hopi prudencia pa loke ta trata decisionnan cu lo hisa e costo di un vacacion y mester evalua con esaki lo por impacta demanda pa Aruba.

Ta haciendo e estudio riba e impacto di demanda door di aumento di gasto di un vacacion. Pa esaki a contrata University of Central Florida (UCF). E prome parti di e estudio aki a enfoca riba e efectividad di mercadeo, pa asina establece con efectivo e strategia di A.T.A. ta y entre otro ki fondo mester dispone di dje como A.T.A. pa por sigui pusha resultadonan desea. Actualmente ta trahando riba e di dos parti di e estudio, unda ta enfoca riba e impacto cu entre otro un incremento den impuesto (introduccion di BTW) lo tin riba e demanda di turismo y riba e cantidad di anochi cu un turista ta keda Aruba. Esaki banda di otro elementonan incluyendo tasa di inflacion halto. Basa riba diferente scenario lo wak e impacto riba demanda. Ta spera di por tin e resultadonan di e parti aki di e estudio cla entre fin di augustus y comienso di september. E tercer parti di e estudio lo enfoca riba e percepcion di bishitantenan riba un incremento potencial di costo. Cu e resultadonan aki lo purba saca afo ki tipo di mensahe lo mester uza pa comunica cu bishitantenan na momento cu tin un incremento di impuesto of otro aspectonan cu lo impacta e costo di un vacacion pa Aruba. Pa e estudio aki ta encuestando bishitantenan.

Mirando e situacion economico mundial, mester tene na cuenta, no solamente e aspectonan local cu ta impacta costo di un vacacion pa Aruba, pero tambe inflacion proyecta den diferente di nos mercadonan. Nos mercado principal, Estados Unidos ta mirando un inflacion hopi halto na e momento aki- bayendo for di 8.6% na mei te cu 9.1% na juni, un record den 41 aña. Pa 2023 ta spera un inflacion di entre 2 y 2.5%. Pero tin hopi incertidumbre y preocupacion ta sigui pa un posibel recesion den 2023 y 2024.

Manera menciona, A.T.A. lo sigui enfoca riba e estudionan menciona y lo comparti e resultadonan cu gobierno y otro socionan clave pa asina decisionnan por wordo tuma cu e prudencia necesario y mas cu claro tur dirigi riba logra metanan pa 2023 y despues y sigui stimula e trajecto di recuperacion fuerte. Mirando e importancia di turismo y con esaki por impacta hopi otro aspecto, incluso entrada proyecta pa gobierno / pais Aruba, como tambe calidad di bida di tur habitante, prudencia ta necesario.

SETAR a tene su Avigilon ALTA Launch Event cu enfoke riba e futuro di seguridad
(ADVERTORIAL)
Mas Economia
Lesa Mas
CBS: Bestaansminimum a subi atrobe na Aruba debi na aumento di gasto di cuminda
ORANJESTAD - E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
Mas Economia
Lesa Mas
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Mas Economia
Lesa Mas
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Mas Economia
Lesa Mas
Schlipken: Aruba ta spera 18 mil turista Brasilero den 2024
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
Mas Economia
Lesa Mas
Aeroliña Mericano a reduci prijs di pasashi pa Aruba cu 50% e siman aki!
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
Mas Economia
Lesa Mas