Mei miyon persona na Japon ordena pa evacua debi na inundacion causa pa awacero

MIAMI – Un ola tropical net west di Islanan di Cabo Verde ta produciendo yobidanan desorganisa y actividad di tormenta. Condicionan Ambiental ta pronostica pa ta conducive pa desaroyo gradual di e sistema. Y e por converti su mes den un depresion tropical den weekend of comienso di otro siman mientras cu ta move direccion West y posiblemente drenta Caribe. Chens pa desaroyo den 7 dia ta grandi, esta 70 porciento. No ta conoci ki efecto e por tin pa islanan ABC ainda. 

NEW DELHI – India por lo pronto lo no otorga visa pa ciudadanonan Canades. E ta e ultimo paso den un problema diplomatico cu a surgi entre Canada y India, desde cu e premier di Canada a acusa India di ta posiblemente meti den un asesinato di un lider Sikh na Canada. E organisacion cu ta otorga visa, a bisa cu e servicio ta para, por lo pronto. India a alerta su ciudadanonan caba pa ta cuidadoso ora cu nan biaha pa Canada of si nan ta na Caanda aworaki. Supuestamente diplomaticonan Indio a keda menasa na Canada tambe segun India. 

NEW YORK – Prijs di petrolio ta aumentando rapidamente y esaki tin efecto mundial grandi. Awe mainta e prijs di un bari di petrolio tabata na 95 dollar, cu ta e tarifa mas halto desde un aña. Tambe prijs na pompstacion ta aumentando. Siman pasa Aruba a conoce e prijs mas halto pa e aña aki pa e productonan petrolero manera gasolin y kerosin. Henter aña caba e prijs ta tambalea entre 75 y 85 dollar pa bari pero ultimo simanan e prijs a subi mas. Tin hopi demanda petrolio, y segun e agencia internacional petrolero, nunca antes tabatin asina hopi demanda pa petrolio cu den 2023. Ta trata di casi 102 miyon bari pa dia. E demanda halto ta debi cu economia Chines ta mehorando di e crisis di coronavirus. Y tin mas buelo, pa cual aeroliñanan mester di mas gasoline pa nan bula. Di otro banda, paisnan produciendo petrolio, a caba bisa cu nan ta bay frena e produccion y sigur te cu fin di e aña. Ta papia di paisnan manera Saudi Arabia y Rusia. 

WASHINGTON – E 5 Mericano Irani cu a keda libera dialuna den un intercambio di prisoner, a yega Merca diamars mainta riba un aeropuerto militar na Washington Merca. Di e 5 Mericano, identidad di tres ta conoci. Ta trata di dos comerciante Siamak Namazi (51) yEmad Shargi (59) t activista di medio ambiente  Morad Tahbaz (67). Namazi a keda deteni na 2015 opgepakt na Iran, y e otro dosnan na 2018. Tur tres a keda acusa di spionahe. Riba peticion di famia, e identidad di e otro dosnan a keda secreto. Ta varios luna di negosacion tabatin na y door di Qatar. Delegacionan di ambos pais tabata sinta den diferente hotel unda cu constantemente e mediadornan tabata negosha. Na 1980 Merca a kibra relacion cu Iran debi na e asunto di rehen den embahada Mericano na Teheran. Condicion pa e liberacion tabata cu Merca libera e fondo di 6 biyon dollar, pega riba un cuenta na Sur Korea. E intercambio tabata posibel despues cu e placa a keda transferi di Seoul pa cuentanan den e capital di Qatar, esta Doha. 

CARACAS – Venezuela ta hopi interesa pa bira miembro di BRICS, e ekivalente di e grupo di paisnan mas poderoso di mundo, G7, cu paisnan manera  Brasil, Rusia, India, China y Surafrica) y e banco nobo di desaroyo crea pa e grupo aki di pais.   

MONTREAL – Aruba lo reemplasa su pasaporte cu credencial digital. Por lo menos asina portalnan internacional manera ‘contacto news di Paraguay’ ta raporta dialuna. E portal ta referi na informacion cu segun SITA, e proveedor di technologia di informacion pa industria aereo, y gobierno di Aruba siman cu a pasa na Montreal, a mustra e implementa cion exitoso di technologia di credencial digital vericable, eliminando e necesidad di cu pasaheronan mester mustra nan pasaporte fisico ora cu nan yega e isla. Cu e implementacion di e tecnologia aki, gobierno di Aruba ta spera pa verifica e identidad di e bishitante cu ta yega e isla, conviertiendo nan mes den e prome pais na mundo pa haci esaki. Ya na maart, pasaheronan ingresando Aruba, tabta por a solicita nan autorisacion di biahe mediante un proceso simplifica, cu tabata elimina e necesidad di ingresa informacion di documentonan di viahe riba papel, cu consentimento previo pa por comparti datonan desde nan telefon mobil incluyendo punto di contacto manera hotel y car rental. Noticiacla a tuma contacto cu director di imigracion di Aruba Andrew Hoo pa un reaccion, y e la keda di comunica bek, pero ainda no a haci esaki. Loke por a compronde si ta cu esnan cu a raporta e informacion, a simplifica e asunto hopi, pero cu ta trahando riba e proyecto aki si.