Diabierna ta anuncia ‘ahuste’ di tarifa di awa y coriente!

ORANJESTAD – Despues di un luna cu WEB a ‘suspende’ e aumento di tarifa di awa, diabierna awor, WEB lo haci un anuncia e ahuste nobo di tarifa di awa y e biaha aki tambe, di coriente. Esaki lo sosode durante di un conferencia di prensa diabierna atardi, unda cu ademas lo anuncia e factornan cu a conduci na e ahuste. Tambe lo anuncia un plan di inversion pa bira menos dependiente di HFO. 

ANUNCIO Y CANCELACION

Tabata dia 30 di juni ultimo cu WEB a gara tur hende di sorpresa cu e anuncio di aumento di tarifa di awa entrante 1 di juli, esta e siguiente dia. Hasta gobierno a wordo gara di sorpresa, segun prome minister Evelyn Wever por lo menos, y no a dura mucho cu un dia despues, a bin un di dos anuncio, anunciando cu lo suspende e aumento te proximo aviso. Despues di un reunion cu minister encarga cu energia Glenbert Croes, e la anuncia cu prome cu fin di luna aki, lo tin un anuncio nobo, y cu e mester ta mas social.