Encuesta: ‘Popularidad’ den Parlamento casi status quo pero ACCION21 ta pasa Raiz

ORANJESTAD – Segun e ultimo encuesta di Noticiacla teni siman pasa riba midimento di e panorama politico, 81% cu a participa, si tabatin un eleccion mayan, lo vota pa loke tin awor, esta e partidonan cu ta forma Parlamento awor. E diferencia ta cu e partido RAIZ so lo no score mes bon cu e eleccion ultimo unda cu ACCION21 ta pasa RAIZ den popularidad. E encuesta a inicia siman pasa dialuna y a dura 5 dia. Un total di 1433 persona a participa di cual mayoria tabata homber. Den un otro raportahe, noticiacla a cubri e prome parti di e encuesta. 

E RESULTADO. 

Den e espacio aki, ta bay mas riba cua partido lo vota, si tabatin un eleccion parlamentario awe. Y ta aki ta unda cu 81% cu a participa, ta mustra di lo vota manera cu e situacion ta awor, cu excepcion di RAIZ. Un otro punto interesante ta cu mientras cu MEP ta na cabez cu 38% y popular entre tur e edadnan encuesta, cu excepcion di e grupo mas hoben di 18 pa 24 aña, 19% kier algo nobo, of por lo menos, loke no ta den Parlamento aworaki. Ta sigui AVP cu ta na 18% (mester bisa si cu experiencia ta bisa cu e grupo di AVP ta conoci pa no participa den encuestanan cu nan no ta organisa:red), sigui pa partido MAS cu 13%, ACCION21 cu 10%. Y finalmente RAIZ Cu apenas 6%. En general, 58% ta bisa cu lo vota bek, y sa pa ken nan ta vota, y 83% lo vota atrobe.  

DISCLAIMER

Manera semper, e resultado di e encuesta aki, ta pa metanan puro noticioso. Ademas, tambe, no ta pretende cu e resultadonan obteni ta un refleho di Aruba completo, sino di usuarionan cu tin aceso na e portal noticiacla. Un total di 1453 persona a participa na e encuesta (e mester ta minimal 500 pa por tin un representacion), di cual mayoria tabata hende homber den e caso aki.