Chabelito di 10 aña gara tray stuur di un SUV coriendo na costa norte di Aruba

ORANJESTAD – Un grupo di 4 mucha di entre apenas 9 pa 10 aña, a wordo ‘gara’ ta core un auto a la grandi na parte norte di Aruba e siman aki. Cuater chabelita di no mas cu 10 aña sinta den un SUV blanco cu number di auto local, di cual e chauffeur, un di e chabelitonan aki, tabata ‘mustra’ su abilidad di core auto. Un grupo di turista a mira esaki y con esaki tabata wordo filma tambe. Despues a mira esaki riba e Plataforma Tik Tok y a bati alarma. Nan a keda desapunta di mira con 4 mucha por ta haciendo esaki den un forma iresponsabel aki na Aruba. Nan a splica cu nan conoce Aruba como un isla di orden publico netchi. Pero ora cu nan a mira esaki, nan a spanta. E muchanan tabata pone nan mes y otronan na peliger. Por bien ta cu a pensa cu unda cu nan tabata core, tabata safe ya cu ‘no tin otro trafico’, pero den e mesun ‘suerte’, por a perde control y bolter cu tur consecuencia. E hecho cu turistanan a bin haya esaki, ta mustra tambe cu nan por a haya nan mes mal sirbi. Noticiacla a opta pa no pone e video, pa asina ‘no mustra cara di e muchanan’, pero a compronde tambe cu e video ta den man di polis caba si.