SIMAR: Aumento di tarifa di awa di WEB ta un baño di awa friu

ORANJESTAD – Sindicato di maestro SIMAR ta considera e anuncio di aumento di tarifa di WEB como un baño di awa friu, y a manda nan preocupacion pa prome minister Evelyn Wever Croes diahuebs atardi mes. Den e carta nan ta splica nan preocupacion y desaprobacion di e loke a sosode.  E noticia pa miembronan di e sindicato, a bin como un sorpresa total, y cu ta haci nan situacion financiero aun mas fastioso, banda di e recorte salarial. A comparti cu varios miembro ainda tin problema tur luna pa cera placa pa por cubri nan gastonan. Ademas nan tin duda ainda cu enberdad luna di juli 2022 lo nan haya e recuperacion manera priminti di e 5% di salario. “Nos ta en espera ainda di e decision definitivo di e recuperacion di 5% di salario” e presidente di sindicato ta bisa. A recorda cu awa ta un necesidad basico y primario y cu esaki lo aumenta e problemanan social den enseñansa. Acerca a bin e problema di luna di mei y juli di aumento drastico di gasoline, cu ta limita e mobilidad di varios miembro. 

Ta bin tambe e asunto di e regla di VUT cu awor ta mustra menos positivo segun e sindicato, mirando cu den situacionan hopi limita, lo aplica esaki y cu e ta bira engañoso, pasobra pa haci mencion cu docentenan por haci esaki, siendo cu cerca un grupo, e peticion lo keda rechasa di antemano. A pidi pa den futuro, si tin mas noticia negativo asina, pa informa e sindicato cu hopi mas anticipacion. Y por a compronde di e sindicato cu ta pidi e mandatario pa interveni como accionista principal y prome minister den nan beneficio pa suavisa e medida anuncia di e tarifa. Lesa e carta completo AKI.