Na Corsou tabatin intento di atraco riba truck carga cu combustibel di Curoil

WILLEMSTAD - Djaluna den oranan di anochi, a tuma lugá un intento di atrako riba un trùk di distribushon di kombustibel di Curoil. E shofùr atento ku a tuma nota ku un deskonosí a logra subi riba trapi di e trùk, a kue mesora direkshon pa warda di polis Rio Canario i di e forma aki a logra evitá un suseso ku por tabata tin un desenlase lamentabel.

Curoil ta informá ku e intento di atrako riba un trùk kargá ku kombustibel ta un akto totalmente deskabeyá ku por a trese bida di hopi hende den peliger. Produktonan petrolero ta sumamente flamabel i ta rekerí pa atendé ku esakinan ku suma koutela i segun protokòlnan estrikto di seguridat. Curoil entretantu, a tuma medidanan di seguridat adishonal pa garantisá seguridat di su empleadonan i seguridat riba kareteranan.

Curoil ta lamentá e suseso aki i e kaso ta bou di investigashon di Kuerpo Polisial. Mas aleu Curoil ta enfatisá ku trùknan di distribushon di Curoil i Curgas NO tin sèn kèsh riba nan. NOTA: E texto ta scirbi na Papiamento fonetico di Corsou.