Vacacion familiar pa Aruba a bira un pesadia debi na yiu autista, y famia ta ‘pega’ na Aruba

ORANJESTAD – Un vacacion familiar pa Aruba a bira un pesadia pa un famia Mericano. Tur esaki debi na e hecho cu un di e miembronan di famia tin ‘autismo no verbal’. E famia completo a bin Aruba dia 10 di mei ultimo, y ora cu nan kier a bula bay bek un siman despues, e yiu Elijah en cuestion di 15 aña, a haya un atake di panico abordo, cu mester a baha full e famia di e avion. E famia for di e momento ey, tin un siman ta buscando forma con pa biaha cu e hobencito sin cu e ta haya mas atake asina. Parti di e famia tabata poni pa biaha separa awe, mientras cu e mama, Jamie, ta busca alternativa pe y su yiu homber autista. Un opcion ta un avion ambulance of via boto, pasobra e yiu no kier tende di sub un avion, of un avion yena cu mas hende.  

KICO A PASA

Segun e famia a conta un medio di comunicacion Mericano, ora cu e famia tabata cla pa aborda nan avion pa Merca, e yiu a haya un atake y cuminsa grita. E piloto a pidi nan pa baha, pa e por a sigui cu e buelo. Mientrastanto a pasa e siman ta busca un solucion, pero placa tabata un problema unda cu mester a cera 33 mil dollar pa un buelo ambulance. Of tuma un crucero of otro boto, envez di avion comercial. E famia a cambia dos hotel caba pa asina yuda baha gasto. “Nos ta den Paraiso pero nunca nos tabatin asina hopi miedo” e mama a bisa. E potret ta di e mama y e yiu, den momentonan mas miho durante nan vacacion na Aruba.