Presupuesto 2022 a bay pa CAft controla esaki y duna reaccion

ORANJESTAD - Presupuesto 2022 a bay pa e colegio di supervision financiero CAft controla esaki y duna reaccion. Minister di finanza Xiomara Maduro a confirma esaki diabierna ultimo. Manera ta conoci, recientemente Parlamento di Aruba a aproba Presupuesto 2022 y esaki a keda firma pa Gobernador y despues e ley a keda publica dia 20 di april den Landscourant. Awor e ley a keda publica, Minister di Finansa a manda esaki pa CAFT pa asina e organo di supervision financiero por duna nan opinion oficial riba e presupuesto cu a wordo aproba pa Parlamento.

TENE CUENTA 

Segun gobierno, a tene cuenta cu consehonan di CAFT y Raad van Advies. Presupuesto 2022 a keda aproba hunto cu dos Nota di Cambio cu a contene cambionan pa por cumpli miho cu e recomendacionnan duna pa CAFT y pa Raad van Advies. Asina den e prome Nota di Cambio, a baha e deficit cu 63,8 miyon florin cu ta e resultado di baha gasto di servicio y producto, inclusion di e ganashi di Setar y e cobransa di subsidio di salario cobra pa SVB. E di dos Nota di Cambio a refleha e efecto financiero di e reformanan di e Landspakket, cu gastonan pa introduci un registro di UBO y fondonan cu lo drenta den e Fondo di Criminalidad pa reinforza e frontera di nos Pais.