E wanta cu Smith a pasa Rock durante Oscars, a tapa e logro di Smith di gana su prome Oscar

HOLLYWOOD – E wanta cu actor Mericano Will Smith a duna colega actor Chris Rock diadomingo anochi durante e presentacion di premionan Oscar (galardon cinematografico), a tapa e logro grandi di Smith di gana su prome galardon despues di 2 intento anterior. Smith a pasa Rock un wanta, ora cu esaki lo a insulta su casa cu un chiste riba su aparencia ‘pelon’. E casa, Jada Smith ta sufri di e malesa di alopecia, cu ta pone bo perde cabey. Smith no a acepta e chiste riba su casa, y mirando cu e casa a reacciona no contento, Smith a opta pa lanta y bay pasa Rock un wanta. E momento ey en bibo, a gara tur hende di sorpresa y a bira e momento mas papia, envez di e hecho cu porfin, despues di 20 aña, Smith ta logra su prome galardon. 

Smith a keda nomina prome biaha pa su papel como Muhammed Ali, y 5 aña despues den e pelicula The Pursuit of Happiness. E prome biaha, Denzel Washington a gana e premio, y e di dos biaha, Forest Whittaker a bay cu e premio. Smith prome biaha a gana e premio pa a personafica e tata di e tenistanan Venus y Seren Williams, den e pelicula King Richard. Durante e ricibimento di e premio, Smith a pidi e academia despensa pa su acto, y Rock a opta pa no entrega keho contra Smith. Pero e comentarionan a bay viral y ta premira cu esaki lo bira e noticia mas cu e hecho cu Smith a gana e premio cotisa. Ademas, e por tin efecto riba e carera di Smith segun expertonan cinematografico.