Minister na Noticiacla: Pa fin di 2022 lo cera Dump di Parkietenbos

ORANJESTAD – E intencion ta pa fin di e aña aki, cera e dump di Parkietenbos pa semper. Ora cu a puntra e mandatario encarga Ursell Arends si ‘mester’ of ‘lo’ cera e dump, e mandatario tabata hopi breve:” Lo cera dump!” e mandatario a bisa cu siguransa. Con esaki lo sosode ainda no ta mucho conoci, pero ta spera cu pa den curso di e aña aki, haya mas informacion riba exactamente con e tin pensa di haci esaki. Ta conoci cu pa varios aña caba e dump ta un problema pa primordialmente e habitantenan di Parkietenbos, pero tambe pa medio ambiente en general y e isla completo. Protesta, marcha y accion tabata poco, pa mustra gobernantenan di awor y pasado, cu e dump no por keda habri. Pero ningun a logra te awor, cu forma concreto. Recientemente ainda secretario nobo di estado Hulandes Alexandra van Huffelen a topa cu activista Anouk Balentina riba e tema aki durante su bishita relampago. No ta conoci kico e encuentro aki lo nifica y si Hulanda lo duna e asunto aki mas atencion awor cu e mandatario Hulandes a bishita esaki.