Premier Wever: Ta cera tur bar, rumshop y nightclub na Aruba entrante awe

ORANJESTAD – Gobierno di Aruba a anuncia algun medida ‘nobo’ diaranson anochi debi na e brote explosivo nobo di casonan positivo local di COVID-19. E mandatario tabata desapunta, y hopi decepciona pa e situacion cu a surgi e ultimo tres dianan. E ta considera e brote, un aumento drastico, pero mes momento tambe ta bisa cu ‘e pior di e crisis tin cu bin ainda’. E no a specifica kico e kier men si cu e declaracion aki. A alerta tambe cu den e proximo 24 pa 48 ora lo tin mucho mas casonan positivo cu lo por wordo anuncia. 

MEDIDANAN NOBO

Entre nan, cu entrante inmediato, tur bar, rumshop y nightclub tin cu cera nan porta te proximo aviso. Ademas, mondkapje a bira obligatorio ora ta haci uso di transporte publico y ta bishita establecimentonan local. Tambe ta prohibi fiesta na cas priva. Segun minister Dangui Oduber den splicacion pa e portal aki, a bisa cu polis lo haci controlnan necesario. A repasa e medidanan tambe anuncia anteriormente manera samenscholings verbod cu tin mas cu 4 hende. Tambe a papia riba e paro di bishita na casnan di grandi te proximo aviso. 

FRONTERA CU CORSOU

A pidi pa tur ciudadanonan di Aruba cu ta na Corsou, pa haci tramite pa yega Aruba bek inmediatamente, pasobra e isla bisiña lo a cera entrante awe mei anochi pa Aruba te proximo aviso. Esnan cu ta na Corsou, mester haci tramite pa bolbe Aruba mesora. Mientras cu Bonaire tambe ta cerando frontera pa Aruba, no a bisa si e regla aki ta conta pa nan tambe. 

SCOLNAN 

Mirando cu scolnan ta bay habri proximamente, e team di crisis no a tuma un decision ainda riba esaki. Pero premier Evelyn Wever Croes a priminti cu lo anuncia na tempo, kico e pasonan of decision ta riba e tema aki. No sa si ta cera scol, of ta alarga e vacacion escolar, y tur cos ta depende di e situacion actual.