Oduber: Aruba ta COVID free awo cu ultimo pashent a test negativo

ORANJESTAD – Aruba ta COVID-19 Free. Asina minister di Turismo Dangui Oduber a anuncia diahuebs merdia riba su pagina di Facebook. Segun e mandatario di turismo, e ultimo pashent cu a keda (cu por cierto tabata den ICU), a test negativo pa e test y como tal ta considera cu awor Aruba ta sin persona cu tin e virus actualmente, esta active. Di otro banda tin ainda 158 persona cu ta den cuarentena y cu potencial pa haya e simptoma. De hecho na Corsou tin tres caso positivo, di personanan cu tabata den cuarentena. Tur tres ta personanan cu a bin di afo, y a bay den cuarentena. Esnan cu ta den cuarentena na Aruba, tur ta personanan cu a bin di afo recientemente.