Comportacion riba caya durante Shelter in Place ainda ta laga di desea

ORANJESTAD - Cu tin mucho hende riba caminda ainda, durante e Shelter in Place ta un hecho. Diabierna mainta Noticiacla a produci un video riba caminda, unda cu den careda di 10'or di mainta, a nota un fluho di trafico den centro di Oranjestad, cu ta duna indicacion cu ainda tin mucho hende riba caminda. E intencion di Shelter in Place, ta pa tur hende keda cas, y solamente sali pa e.o. bay supermercado, botica, pompstacion of busca cuminda. Tambe por cana y haci ehercicio. Pesey a tuma e orario aki, unda cu por sali di e punto di bista cu, cu excepcion di bay laman, of supermercado, no mester ta riba caminda. Mainta tempran, of merdia y atardi, ta comprendibel cu tin mas hende riba caminda pa busca cuminda (ora di cuminda), ehercicio (solo ta abou) of posiblemente bay botica. Mientras cu cada hende ta diferente, e opinion mesora riba e video, ora cu a post esaki riba Facebook, ta cu asina mes ta considera esaki como 'hopi trafico'.