Scol ta keda cera 5 siman mas na Aruba relaciona cu virus

ORANJESTAD – Gobierno di Aruba a dicidi cu scolnan ta keda cera te por lo menos 5 siman mas y ta habri (tentativamente) dia 11 di mei 2020. Asina minister di enseñansa Rudy Lampe a declara diahuebs merdia durante e briefing riba coronavirus. Esaki ta bira di cuater biaha cu ta prolonga ciere di scol relaciona cu e coronavirus. E mandatario a bisa solamente cu mirando e situacion actual, no ta prudente pa laga muchanan bay scol bek ‘ainda’. 

CIERE ANTERIOR

Anteriormente tabata dia 13 di maart ultimo cu a anuncia ciere di scol te dia a anuncia cierre di scol dia 13 di maart te dia 20 di maart 2020. Despues a prolonga esaki te dia 31 di maart 2020. Pero mas despues a prolonga esaki te dia 20 di april, esta despues di Paasvacantie. Awe, ta bira e di 4 prolongacion, cu ta pone te dia 11 di mei 2020.  

MAESTRONAN

Diaranson ainda noticiacla.com a raporta riba e frustracion di docentenan cu ta hayando presion di nan hefe di scol pa cu e preparacion digital cu nan sea no tin of no completo. Mayoria scol ta purbando pa bay digital, pero sea no tin e preparacion of material pa haci esaki. Con cu ta, e docentenan ta haya presion cu nan tin cu wak con nan tin cu haci pa por sigui duna les. Sindicato SIMAR a cay aden y a bisa cu no ta acepta e abuso di presion di e hefenan di scol, y lo atende cu e asunto aki.  

LES DIGITAL

Aworaki tin scolnan cu ta duna les digital normal, pues e unico diferencia ta cu e alumnonan no ta den klas, pero na cas y ta sigui e les via internet usando e concepto di blackboard. Otronan (alumnonan) ta haya huiswerk of lesnan pa haci na cas, y ta wordo asisti pa nan mayornan, pero tin tambe cu no ta hayando nada, of no tin e luho di haya ayudo di mayor pasobra e mayor no ta capaz pa haci esaki.