Gobierno a introduci medida relaciona cu casonan positivo di coronavirus na Aruba

ORANJESTAD – Cu e yegada di dos caso di coronavirus na Aruba, gobierno di Aruba a anuncia cierto medida cu ta drenta na vigor entre awe diabierna y diadomingo. A decreta un estado di crisis official, cu ta duna nan mas autoridad y espacio pa funciona. E decisionan ta varia entre biahamento, eventonan cancela y scolnan cera. 

BIAHENAN

Pa tanto biahe di avion y crucero, ta restringi pasaheronan cu ta bin di paisnan di Europa y otro paisnan cu ta riba lista di WHO, cu excepcion naturalmente di Arubianonan residencia na Aruba cu ta den exterior y tin cu bin bek. Esaki ta cuminsa diadomingo 15 di maart proximo pa duna gobierno espacio pa ‘regla un que otro’ bon. Y e regla aki ta te dia 31 di maart proximo. Ta cuminsa diadomingo cu e biaheronan di Europa pero entrante diasabra caba tin un controle riba tur pasahero cu drenta Aruba. (100% controle). 

ACTIVIDADNAN PUBLICOGobierno a cancela tur actividad publico na Aruba inmediatamente te dia 31 di maart, pa despues evalua. Ta trata di actividad deportivo, cultural y social. Tur actividad di gobierno, y actividad priva tambe. Esnan cu tin permiso di polis, lo haya notificacion cu esaki ta wordo revoca. Cu esaki, tur actividad rond di 18 di maart tambe ta keda cancela. 

SCOLNAN

A dicidi tambe como medida di precaucion, di cera tur scol otro siman. Esaki ta conta pa scol di tur nivel. Ya caba scol ta cera diaranson pa diabierna debi na dianan liber y ATV. Pero lo cera scol dialuna y diamars tambe pasobra muchanan por transmiti e malesa facilmente na otronan. Y awor kier frena esaki pa no sosode asina facil. 

EVALUACION

Tin un programa di evaluacion cu ta pone cu lo evalua e decisionan tuma diabierna. E decisionan tuma por cambia hopi liher tambe y a pidi comprension pa cu esaki.