Cu fayecimento di ‘Don’ Mansur, Aruba ta perde un gran yiu di tera

ORANJESTAD – Manera cu NoticiaCla.com a raporta diamars anochi, e noticia di fayecimento di e conocido comerciante y ex mandatario Elias Fernando (Don) Mansur (76), a hala hopi atencion. Tabata diamars atardi cu e noticia a drenta cu Don Mansur a fayece den hospital na Aruba, despues di un periodo di enfermedad. Gran parti ta pa su forma di trata hende, tanto personal como professional. Manera priminti tambe, NoticiaCla.com ta repasa parti di su bida professional, unda cu mas el a haci un impacto. 

COMERCIO

Den comercio Don Mansur a laga su marca atras, ya cu durante su bida, el a ocupa varios funcion importante manera accionista y of director divarios companianan na Aruba, Corsou, Bonaire, St Maarten, Merca, Panama y otro islanan den Caribe. E tabata e prome presidente di Banco Central di Aruba na 1986, presidente di Aruba Trade and Industry (ATIA) di 1976 pa 1978, pa cual na 2015, durante e celebracion di e gremio su 70 aña, a dune un reconocemento special. Tambe e tabata miembro di directive di WEB, Garage Cordia y e tabata Consul Honorario di Paraguay na Aruba. Te na ultimo por a wak e na un di e negoshinan cu e tabatin cu ta esun di muebles, esta Ansot, unda cu e tabata sa bishita frecuentemente y presencia e operacion rato rato. 

POLITICA

Den politica tambe Don Mansur a laga su marca atras, unda cu prome e tabata minister di Economia di Antias durante gabinete Liberia Peters (1984-1986). Ora cu Aruba a haya su Status Aparte na 1986, Don Mansur a sigui den e funcion como Aruba su prome minister di Economia y Turismo di 1986 pa 1989. Su marca definitivamente a keda atras y lo e wordo recorda pa tur su bondad cu el a haci pa Aruba y otro paisnan cu el a colabora y aporta. Cu Don Mansur sosega na paz. Pa loke ta despedida, famia a pone e fecha di diahuebs 18 di juli 2019 di 6 pa 9or di anochi na Royal Funeral Home pa oportunidad pa condoleer.