ORANJESTAD — Aruba Fair Trade Authority (AFTA) ta alerta pa posibel riesgonan pa competencia den sector di seguro na Aruba, si un compania di seguro competidor haya un participacion financiero directo of indirecto den ENNIA Aruba.
E advertencia ta sigui un analisis preliminario relaciona cu e proceso di benta di ENNIA Aruba, despues di restructuracion di grupo ENNIA. Den por lo menos un di e ofertanan preliminario, un competidor den sector di seguro ta involvi.
Segun AFTA, participacion financiero entre competidornan por afecta nan independencia comercial y crea riesgo di intercambio di informacion sensitivo. Esaki por debilita competencia y eventualmente tin consecuencia pa primanan di seguro, calidad di servicio, condicionnan y escogencia di productonan pa consumidornan.
AFTA ta enfatisa cu ainda ningun transaccion a tuma luga y no a constata ningun infraccion di ley. E autoridad lo evalua e structura final di e transaccion pa determina si tin motibo pa inicia un investigacion formal.
Si un investigacion confirma un infraccion di Mededingingsverordening, AFTA por impone boet y tuma medidanan pa termina e infraccion.