Plan di impuesto aproba; futuro di coalicion hulandes ta insigur

DEN HAAG — Tweede Kamer (Parlamento hulandes) a aproba e plan di impuesto cu e mayoria minimo di 76 asiento, pero sin sosten di partido di coalicion VVD. E votacion a profundisa e crisis entre VVD y su socionan D66 y CDA, poniendo continuidad di e gabinete minoritario bou di presion.

VVD a vota contra despues cu D66 y CDA a sostene un amienda di Pro y Volt pa aumenta impuesto riba personanan cu tin hopi patrimonio. Lider di fraccion VVD, Brekelmans, a describi e resultado como “desconcertante”, pero ainda no a anuncia si su partido lo bandona coalicion.

Pa sigura aprobacion, D66 y CDA a busca sosten di Denk y Partij voor de Dieren. Como parti di e acuerdonan, impuesto riba avionnan priva lo subi y un aumento di prijs di ticket di trein lo wordo kita di mesa. E concesionnan na Denk no ta conoci.

E situacion ta particularmente delicado pa VVD, pasobra su minister di Finansa, Heinen, lo mester ehecuta un plan cu su propio partido a rechasa.

Premier Jetten a declara cu e lo haci tur esfuerso pa restaura cooperacion den coalicion y kier reuni cu vicepremiernan Yeşilgöz di VVD y Van den Brink di CDA. Lider di VVD, Yeşilgöz, anteriormente a exigi un “reset fundamental” di e cooperacion.